Kem Lingón 50 - Udél Dwata: Gna Kesfasad ne Lomi Kesfasad

Lingón Asaf

¹ Mudél yóm Dwata laen dù là gbeken du yóm sana Dwata hol gónó mogot. Tinoken yóm kdéen tau talak tonok lenwóten fi dmata kdaw kól desdef.

² Lenwóten bè Bulul Sayun yóm bulul tódô ket du ktiloben, gónón gfan yóm tey keslinang Dwata.

³ Mógów edini yóm Dwata tekuy, ne là kóen tódô yem. Wen tey ofi eles tukô gna du, gotu kenen kdéen, ne mbel gu hilolen yóm tey lenos bong.

⁴ Tinoken longit ne tonok mò temksì du yóm kkukumen yó kem kun tau.

⁵ Yó udélen, monen, “Sentifun ye lu ebéléu yó kem dou tau là monol nawa le mimón do, yó kem tau deng dumuhu sfasad mlan bè kedsù le.”

⁶ Yó heglalag yó kem lafin longit, duhen yóm ktedeng Dwata, yakà du se yóm kmukum.

⁷ Yó udél Dwata, monen, “Hol hnungol ye ou, kem dou tau, wen udélu ebélê ye. Ou se Dwata yóm hol kuy Dwata. Ni se yó kem duónu kuy, kem tau Israél.

⁸ Là nudélu kuy bè yóm tendo gel kedsù ye ebéléu, dalang se yóm dsù tendo gel hkekeb ye ebéléu.

⁹ Okóm là bud henmóyóu du ne yó kem safì tudu gel sen-gyok ye, ne kem kambing lemwót bè kukub ye.

¹⁰ Yakà dou fun le yóm kdéen ógóf lem dlag, ne bud dou fun le yó kem safì mótób ta yó kem lemibu bulul lemnek.

¹¹ Dou fun le snéen yóm kdéen onuk koyu lem bulul, dalang se yóm kdê ógóf lem bnes, hono dou fun le.

¹² Ke bitile, là kóe mni bélê ye ken, yakà dou funen yóm klamangen benwu ne yóm kdê nô lemen.

¹³ Kenu kô yó kem safì tudu gel dsù ye? Ninumu kô yóm litô kambing? Là kô kenu du se dou.

¹⁴ Yó hol hnebelu bélê ye ke tahu duhen yóm keslamat ye béléu, ne ke hol dnohò ye yóm deng fasad ye dou yóm Dwata hol dandónen geta.

¹⁵ Ke wen gfà ye, tmaba ye ebéléu, lenwau yu mò gónó ye dmóyón dou.”

¹⁶ Okóm yó udél Dwata ebè yó kem tau mò sidek, monen, “Laen kô dù muhen bélê ye ke utóm ye yó kem dou hlau. Laen kô dù muhen snéen ke gel sentulón ye yóm deng senfasad tekuy.

¹⁷ Yakà deng kenbê ye du yó kem dou hlolò kuy, ne là kô hnungol ye du yó kem dou udél ebélê ye.

¹⁸ Deng ye mom mit swè bè yó kem tau mnagaw, ne deng ye slomong bè yó kem tau mdà yehen.

¹⁹ Hono sidek yó kem udél gel btang bè sumóng ye, ne mahil bélê ye tmulón kéng.

²⁰ Tendo ye seyón sentulón ye yó kem kuy dumu. Tendo tnifù ye kéng yóm dumu ye sulil-lem.

²¹ Yóm igò ye mò du ni kem ni, tódóe yem. Ofo kuy ke mkéle bélê ye. Okóm ni nudélu yu, ne listahu bélê ye yó kem duónu kuy.

²² Ni mò hendem ye, yu kem tau là bud hemdem dou. Ke là hnungol ye dou, gotu nséku yu, ne laen dù bud lemwà kuy.

²³ Okóm ke hol tahu yóm keslamat ye béléu, henged hol tahu dsù gónó ye madat dou. Ke lolò ye yóm dou lan, hegfanu bélê ye yóm kegewà lemwót béléu.”