Kem Lingón 5 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hnungolem ou bè yóm igou mni. Kenmónem yóm kenblat nawahu.

² Hnungolem yóm tey kehtóbóngu ebéléem. Laen dù dumu gónóhu mni, tek són béléem, yóm Hol Geta ne yóm dou Dwata.

³ Hnungolem, Dwata, yóm knihu béléem ke hlafus. Ket hlafusu tendo tmulón du kóm yóm hnihu, tódô eles tngónu yóm angat kbalaem dou.

⁴ Là kói hligal du kóm, Dwata, yóm sidek. Laen kô dù sidek nô béléem bè yó.

⁵ Yó gónóm mon, là kô le gdà bè soluhem yó kem tau heklabak. Tey keklitem kul yó kem tau gel mò sidek.

⁶ Sal genlaem yó kem tau mò kéng. Tey sidek keklitem yó kem tau monok ne kem tau smukat.

⁷ Lemwót bè yóm là konolen yóm kbong nawahem dou, gbeku husek elem Gónóem. Lemwót bè yóm kwen klikou kóm, yó gónóhu tmaba ebéléem lem Gónóem.

⁸ Nalakem ou bè yóm lan tedeng, Dwata, anì là gemmò le béléu yó kem hohonu. Hol hentedengem yóm kóm lan mò lolou.

⁹ Yó kem hohonu, laen kô dù tahu tulón le. Són hendem le kmò keglà le kem dumu tau. Tey sidek yó kem udél le, hol lómón ke boo tau matay deng bolok. Yóm kudél le tey mnóm, bede hono sukat mit hatay.

¹⁰ Ó Dwata, hbóem kul yóm sidek nmò le. Hebtangem lu bè yóm kul udél. Lemwót bè yóm kdê salà nmò le, lohem lu mayuk, yakà deng natù le kóm.

¹¹ Okóm yó kem tau mlo ebéléem, hligal le se kul. Lemwót bè yóm tey kligal le, tendo sngal le yó kem sngal dmóyón kóm. Nofinem lu anì yó hol le hligal kdê yó kem tau kembong nawa kóm.

¹² Yakà tey któbóngem kul, Dwata, yó kem tau tedeng kmò le. Yóm kbong nawahem kul yó se mò kemlung kul.