Kem Lingón 49 - Udél Dwata: Gna Kesfasad ne Lomi Kesfasad

Lingón yó kem sfu Kura

¹ Ó kem kdéen tau bè klamangen, hol hnungol ye nim monu ni.

² Kem tau hol geta, kem tau glaan, tau wen kendengenen, tau élél, hol hnungol ye ou.

³ Abay se tey wen lemen nim udélu ni lemwót bè yóm khulungu temnef.

⁴ Yó kmò ktulónu du kuy, leningónu bélê ye. Bud heglilebu kuy se yóm lanen bè yóm igou kembit du nim ni.

⁵ Béléu dou, là kóe na a likò anien ke deng snibut le ou yó kem hohonu.

⁶ Yó kem tau monu yó, yó kem tau sidek nmò le, són snalig le kendengen le, ne tey keheklabak le du yóm kegeta le.

⁷ Bede laen kô dù tau ke gbeken msok knóen. Là kô gbeken mayad du bè Dwata yóm btes klowilen,

⁸ abay se yóm klowil tau, tey mebtes. Balù nô kbong tô bayaden du yóm klowilen

⁹ anì là matayen ne anì gutahen yóm klowil laen dù tul sónen, là kô nan e gbek mayad du.

¹⁰ Gotu tngón tekuy se, balù yó kem tau alì temngón, gotu le matay se kul. Laen dù gónó le stólóng bè yó kem tau nungel ne bè yó kem tau laen dù tngónen. Gotu tebel le kem kendengen le bè yó kem bud lugod le.

¹¹ Yóm gónó le lembeng kul, yó se hlós kul gónó nô. Laen kô dù sónen yóm knô le bè yó, balù yóm kwen tey tehe tonok nfun le ekni.

¹² Balù nô kegetahen yóm tau, là kô gbeken hemseng du yóm hatay. Angat matay, lómón yó kem ógóf.

¹³ Tu se koni kmoen yó kem tau snalig le knô le, kem tau gsengel nawa le bè kendengen le.

¹⁴ Eles nô ta le hatay le yó kem tau yó, lómón yó kem ógóf. Tendo gel nalaken lu yóm hatay, nalaken lu elem lebeng. Okóm yó kem tau tedeng kmò le, angat le gemmò bè yó kem tau yó, yó kem tau hlós lagas lówó le bè yóm benwu yó kem tau matay, yóm benwu alì mayuk bè yóm tehe kul gónó nô talak tonok.

¹⁵ Okóm béléu dou, angat lenwà Dwata ou, angat lenwaen ou lem hatay.

¹⁶ Béem nófô yóm sotu tau ke baling tau hol geta, ne ke senflósen temnù yóm kendengenen.

¹⁷ Ke matay yóm tau yó, là kô gwiten du yóm kendengenen. Laen kô dù muhen du lem lebengen yó kem kendengenen yó.

¹⁸ Anien he ke gsengel nawahen du yóm klowilen te tonok, ne anien he ke tey kdóyón le du yóm gendengen,

¹⁹ senged katayen snéen, lómón yó kem tehe fuen. Angat nô bélê le ditu bè yóm benwu senflósen kmifu.

²⁰ Balù nô kegetahen yóm tau, là kô gbeken hemseng du yóm hatay. Angat matay, lómón yó kem ógóf.