Kem Lingón 48 - Udél Dwata: Gna Kesfasad ne Lomi Kesfasad

Lingón yó kem sfu Kura

¹ Tey geta yóm Dwata, knóón hol sendóyón bè yóm kun syudad yóm Dwata tekuy ta yóm kun bulul.

² Yóm bulul hol geta alì tilob, tey kehligal yó kem tau bè klamangen benwu bè yóm kton le du. Yóm Bulul Sayun, kun Bulul Dwata, yóm kun syudad yóm Alì Geta.

³ Dwata se nô bè yó kem gónó hofin bè Jirusalim. Gel hegfanen yóm kofinen yó kem kun tau.

⁴ Yó kem dumu tau hol geta talak tonok, yó nmò le, gotu le stifun na le e nundug yóm syudad yó.

⁵ Okóm bè yóm kton le du, tey sidek ketnga le. Ya tey sidek klikò le, botong le mlóy mulék.

⁶ Ne tódô setbol kkel le, ya tey sidek kegnóm le du, lómón yóm libun kmuleng blututen,

⁷ duhen ke lómón kegbaen yó kem kafal bong lemwót bè Tarsis bè yóm ksut yóm lenos bong lemwót fi dmata kdaw.

⁸ Deng gel gungol me se ktiloben yóm syudad yó, okóm ni deng tódô kum mata se mton du, yóm kun syudad yóm Dwata laen dù là gbeken du. Kun syudad yóm Dwata tekuy. Laen dù tul sónen yóm klaen dù hemenen yóm syudad yó.

⁹ Ó Dwata, yóm igò me tmaba ebéléem lem yóm kóm Gónô, sónmò me hemdem du yóm kbong nawam là monolen.

¹⁰ Botong gefet bè són tonok yóm tendo kdóyón le kóm yó kem tau, dalang se któtól yóm boluyem, botong gefet bè klamangen benwu. Yóm sigel kwananem tendo mit kegmò.

¹¹ Hol hefligalem lu yó kem tau bè Bulul Sayun. Hol hefligalem lu yó kem tau bè Juda lemwót bè ktedeng kkukumem.

¹² Ó kem tau Dwata, senibut ye Sayun, nsó ye yóm kdê gónô geta gónó le gel hofin bè yó.

¹³ Henklol ye yó kem beng mbegel hilolen. Hnilol ye yó kem gónó heklung mò angat bud tulón ye bè yó kem lugod ye.

¹⁴ Yóm tey kbegelen yó, hol lómón yó se kun kmò Dwata. Ne laen dù tul sómnen yóm keDwata tekuy du. Du se fen malak tekuy efet kól bè katay tekuy.