Kem Lingón 47 - Udél Dwata: Gna Kesfasad ne Lomi Kesfasad

Lingón yó kem sfu Kura

¹ Hol ye hligal dé, yu kem kdéen tau, sendofì ye hólól ye. Hol dóyón ye Dwata hlan ye bè yóm tey kesngal ye.

² Yóm Dwata gónó tekuy mogot, du se hol dandónen geta bè kdéen, yake hol wen klikò tekuy du. Du se yóm hol dandónen geta kmamal yóm klamangen.

³ Deng hegmoen tekuy bè yó kem dumu tau, ne henbalingen tekuy tau mò mogot kul.

⁴ Deng néléken bélê tekuy yóm benwu gónó tekuy nô. Hlós hfunen tekuy kem tau kenbong nawahen yóm benwu yó, ne tey kehyu nawa tekuy mfun du.

⁵ Bè yóm kotun Dwata ebè yóm gónón myón kmamal, tey hensag tau lemwót bè kligal le, mung du yó kem tey uni féw.

⁶ Hol sngal tekuy yóm sngal dmóyón ke Dwata. Hol tekuy semngal ebè yóm tau dandónen geta mogot tekuy.

⁷ Du se hol dandónen geta bè klamangen benwu. Hol dóyón tekuy mlan bè yó kem sngal.

⁸ Eles gel myón bè yó Dwata bè yóm gónón gel myón kmamal yóm klamangen benwu.

⁹ Gotu le stifun yó kem dumu tau hol geta mogot benwu, mung le bélê tekuy kem kun tau Dwata, yóm Dwata tehe Abraham. Dwata se hol geta senta yóm kdê tau mogot benwu. Laen kô dù bud geta sentahen.