Kem Lingón 46 - Udél Dwata: Gna Kesfasad ne Lomi Kesfasad

Lingón bè yóm knô Dwata bélê tekuy

¹ Són Dwata yóm gónó tekuy e mlo, ne béléen gónón lemwót yóm kgis tekuy. Anien ke wen gfà sut bélê tekuy, eles nô bè yó se kun mò tmóbóng kut.

² Duhen yó, hol bê tekuy abay hlikò, anien ke sut linol bong megsinsig klamangen benwu, ne ke gotu stunal elem mohin yó kem bulul.

³ Baluen ke alì sidek kewók yóm mohin, mung du yóm tey lungkulen, ne baluen ke gotu megsinsig yó kem dumu bulul lemnek, hol bê kuy abay hlikò.

⁴ Ditu bè syudad Dwata, wen él mlel lemen, gel mit kligal lem yóm kun benwu. Bè yó se gónón nô yóm kun Gónô Dwata yóm Dwata hol dandónen geta bè kdéen.

⁵ Bè yóm syudad yó, yó se kun gónó nô Dwata, ne laen kô gembek gembà du yóm kun benwu. Hanà hlafus deng sana sut na a tmóbóng.

⁶ Okóm yó kem tau bè dumu benwu, tey sidek klikò le bè yóm kehsinsig Dwata yóm klamangen benwu. Heték Dwata, ne tódô kmanas yóm tonok.

⁷ Nô bélê tekuy yóm Dwata laen dù là gbeken du, yóm Dwata hol gónó tekuy mogot. Du se yóm Dwata tehe Jakub, ne du se mò gónó tekuy e mlo.

⁸ Géhél ye dé, nénég ye yóm deng nmò Dwata. Nénég ye yóm tey tennga nmoen te tonok.

⁹ Tenfloken yó kem tau sgida bè klamangen benwu. Gotu tenfoken yó kem boho le, ne hensideken yó kem buyus le. Gotu nlóben yó kem klung le.

¹⁰ Yó udélen, monen, “Henek ye ne anì tngón ye ou se Dwata. Ou se yóm hol dandónen geta bè kdéen tau, yóm hol dandónen geta bè klamangen benwu.”

¹¹ Nô lem blóng tekuy yóm Dwata laen dù là gbeken du. Du se yóm Dwata tehe Jakub, ne du se gónó tekuy e mlo.