Kem Lingón 45 - Udél Dwata: Gna Kesfasad ne Lomi Kesfasad

Lingón yó kem sfu Kura

¹ Tey dê kem udél knóón sut lem hendemu yóm igou lemingón du nim lingón ni ebè yóm tau hol geta bélê me. Yóm udél btang bè sumóngu, hol lómón yóm udél gel snulat yóm tau alì hulung smulat.

² Uu se, yóm hol knóón logi bè kdéen. Yó kem udélem, hono gemtóbóng bè kem dumuhem, abay se laen kô tul sónen yóm tendo któbóng Dwata kóm.

³ Uu se yóm sendalù alì gembek, lumakem sudengem ne. Teyi knóón, lelem alì geta.

⁴ Mlan bè kegetahem, kmudai mit kegmò. Nfihem yóm ktahuhen ne yóm kukum tedeng. Sigel kwananem mò du yó kem hentaw ton.

⁵ Tey telem yó kem hanakem, botong metlool kfu yó kem hohonem. Gotu le masà bè soluhem yó kem tau bè yó kem tólóng benwu.

⁶ Yóm gónóm myón kmamal, laen dù tul sónen yóm deng keblay Dwata du kóm. Tey tedeng yóm kogotem yó kem kóm tau.

⁷ Tey bong nawahem du yóm tedeng, ne fen nutó nawahem yóm sidek. Yó gónóm mon, Dwata yóm hol kóm Dwata, deng hegetahen uu senta yó kem dumuhem mlan bè yóm deng ketwélen kóm yóm hnolo mit kligal.

⁸ Yóm nesem, boohen yóm hboo alì minggel boluyen mira ne alus ne kasya. Bè yóm knóem lem yóm gónô bongem klóónen yóm sotu ngom bukay alì mebtes, hfungol le kóm uni yó kem kenbit le mò hmigal kóm.

⁹ Nô béléem bè yó, yó kem ngà libun yó kem tau hol geta, kem libun alì nadat. Bè kwananem gónón mdà yóm libun boi, yóm klóónen hono tahu blówón lemwót bè benwu Ufir.

¹⁰ Ó Boi, ni hnungolem. Uu se ngaen libun yóm tau hol geta, hol henklinguhem nim ni. Klifótem ne yó kem fes lówó maem ne yóm kóm benwu.

¹¹ Yakà dengen gbóy bè ktilobem yóm tau hol geta. Hol nadatem, yakà du se gónóhem mogot.

¹² Yó kem tau lemwót bè Tayal, angat le gotu mit basa ebéléem, nwa le nawam. Lu se yó kem tau alì wen kendengen le, tey wen blay le kóm.

¹³ Ya tey ktiloben yóm ngà libun boi mangat lem dfélen, lemsek yóm nes knóón hnolu blówón.

¹⁴ Nalak le ebè yóm tau hol geta, leseken yóm nes alì tilob. Huli du yó kem sawang libun mung du.

¹⁵ Ye tey kligal le yóm igò le husek elem gónô bong yóm tau hol geta.

¹⁶ Ó Boi, yó kem ngaem logi, angat le baling tau hol geta se kul, mkél le ke mà le. Angat tey dê benwu hogot ye kul.

¹⁷ Lemwót bè nim klingónu kóm ni, là kóen lana yóm boluyem bè yó kem angat lugodem. Yó gónóm mon, laen kô dù tul sónen yóm kdóyón le kóm yó kem tau.