Kem Lingón 44 - Udél Dwata: Gna Kesfasad ne Lomi Kesfasad

Lingón yó kem sfu Kura

¹ Ó Dwata, deng hol kum klingu se mungol du yóm tehe tulón le kum yó kem fù me, duhen yóm kdê deng gendengem bè yóm tehe kul kdaw ekni.

² Yóm deng gotu kehdóhem yó kem tau là hemtahu béléem ta yóm kul tonok anì blayem bè yó kem fù me yóm tonok le. Gotu genlaem yó kem hohon yó kem fù me, okóm kul yó kem fù me yó, fen hbegelem lu.

³ Ke mlan bè sudeng yó kem fù me, là kô guta le du yóm tonok yó. Yóm kegmò le, là lemwóten bè kekgis le, okóm mlan bè yóm tey kegbekem. Yó gónó le gemmò, hol lemwót bè yóm kbong nawahem kul ne bè yóm kehyu nawahem ebélê le.

⁴ Uu se yóm Hol Geta, ne uu se dou Dwata. Deng oluhem eta me kem sfu Jakub yóm kegmò me.

⁵ Mlan bè kfasangem gónó me gembek mlo kul yó kem hohon me. Mlan bè boluyem gónó me gembek mdà kul elaan.

⁶ Là kô snaligu du bohohu. Là kô snaligu du sudengu ke mò lemwà dou.

⁷ Okóm uu se, Dwata, hegmò kum bè yó kem hohon me. Uu se hemyak yó kem tau kmutó nawa kum.

⁸ Ó Dwata, senflós me tendo dmóyón kóm. Laen kô dù tul sónen yóm kdóyón me yóm kóm boluy.

⁹ Okóm ni, deng mom kenbéem mi, ne heglaanem mi. Là bud nalakem kul ne yó kem sendalù me ebè gida.

¹⁰ Là bud hegmoem kum bè yó kem hohon me, ne deng lusem lu anì negef le yó kem kimu me.

¹¹ Lómón kmoem kum, lómón ubiha mò tnétê. Deng gotu senklahem mi ebè yó kem tólóng benwu.

¹² Mi kem kóm tau, lómón ke deng hbaluem mi glaan ne laen kô dù bud btes me.

¹³ Deng ton yó kem benwu hmilol kum yóm nmoem bélê me. Yó gónó le semdekà kum, lel le kmuli kum.

¹⁴ Deng nmoem mi mò utóm yóm gel knuli le. Deng me baling hennê yó kem tau bè klamangen benwu.

¹⁵ Tódô knoyungen kdaw yóm tendo kyaku, là kô bud gbeku temngel ebè kem dumuhu

¹⁶ lemwót bè yóm udél le tendo hemyak dou ne hemnê dou yó kem hohonu móyô meles dou.

¹⁷ Gbunù me nim ni igò me sem là deng kmifót kóm. Là sem deng nulé me du yóm deng senfasad tekuy.

¹⁸ Là kô knogol me kóm. Là se deng senya me du yóm kóm lan.

¹⁹ Okóm deng genlaem mi bè yóm benwu laen hol wen tauhen. Tódô bayaem mi bè yó lem yóm tey kifu mget.

²⁰ Ke deng knogol me Dwata, ne ke deng me mból hólól mni ebè yó kem tólóng dwata,

²¹ kaem deng tngón Dwata ne, yakà gotu tngónen du yóm kdê nô lem but blutut tau.

²² Okóm lemwót bè yóm klolò me kóm, Dwata, gónó le tendo tô hmatay kum ket kdaw. Hol me mkél bè yóm ubiha gel hnatay le.

²³ Btiki, Dwata. Moen du ke tlek kóm tungô? Géhéli btik. Béem abay kenbê mi laen dù tul sónen.

²⁴ Béem abay henbnos mi. Béem abay tódô klifót yóm tey keglayam me ne yóm kehegnok le kum.

²⁵ Deng me tódô masà lem kfung, tódô me lemokob te tonok.

²⁶ Yó ne, Dwata, géhél tnóbóngem mi. Lemwót bè yóm là konolen yóm kbong nawahem kum, géhél lenwaem mi.