Kem Lingón 43 - Udél Dwata: Gna Kesfasad ne Lomi Kesfasad

¹ Ó Dwata, hol hdilóem yóm là ktahuhen yóm gel duón le dou yó kem tau là temngón kóm. Hol nfihem ou. Hewaem ou lem tdok yó kem tau mò kéng ne bè yó kem tau gel mò sidek.

² Tek sónen uu, Dwata, gónóhu gel hofin. Moen de ke tô bayaem ou? Moen ni du ke tódô seflós yóm keglayamu lemwót bè yóm tey sidek nmò le béléu yó kem hohonu?

³ Hlayagem dou dé lanu. Hfungolem dou yóm ktahuhen lemwót béléem. Yóm layagem yó ne yóm ktahuhen lemwót béléem, yó mò fen semgalak dou mulék ebè Sayun, yóm kóm bulul, ne ebè yóm kóm Gónô bè yó.

⁴ Ke lómón yó nmoem béléu, Dwata, angate gógów ebè yóm gónó me gel demsù ebéléem. Tek són uu gónóhen lemwót yóm kligalu. Angate gel hemglung ne semngal mò lanu dmóyón kóm, Dwata. Uu se yóm Dwata dou hentahu.

⁵ Moen du ke alì sidek keblat nawahu? Moen ni du ke alì sbeweg kegnómu du? Dwata he nefet nawahu, angat wen kdawu bud dmóyón du. Du se yóm lemwà dou, ne du se yóm dou Dwata.