Kem Lingón 42 - Udél Dwata: Gna Kesfasad ne Lomi Kesfasad

BOK 2 Kem Lingón 42—72 Lingón yó kem sfu Kura

¹ Tey khebel nawahu kóm, Dwata. Hol lómón ke yóm uhu mlóy, alì sidek kleengen mebel él.

² Lómón yó se kebelu kóm, Dwata yóm Dwata laen dù tul katayen. Kilón de kógówu ebè Gónóem anì naw e tmaba ebéléem bè yó?

³ Tey tendo kkiku kemdaw ne kifu, hol lómón ke yó henged kenu. Lel ni kem hohonu, tendo gel smólók dou, “Nô se yóm Dwata gónóm hemtahu yó du?”

⁴ Tey sidek kebà nawahu du sok gbel bè nawahu yóm gnan kdaw bè yóm kmungu bè yó kem tey tau wen mógów ebè Gónô Dwata. Ou se tehe tukô gna kul yó kem tey tau wen yó. Tey kligal le, gotu le semngal ne mensag bè yóm kdóyón le ke Dwata.

⁵ Moen ni du ke alì sidek keblat nawahu? Moen de ke alì sbeweg kegnómu du? Dwata he nefet nawahu, angat wen kdawu bud dmóyón du. Du se yóm lemwà dou, ne du se yóm dou Dwata.

^6-7 Tey sidek kebà nawahu. Yó gónóm mon, tendo hendemu Dwata. Yóm tey sidek klóngónu ni, hol lómón ke munge konul bè yóm tey dunuk. Ne yó kem tey dê gfau, hol lómón ke tbó te kuluhu yóm tey él bè hikong lemwót gu bè yó kem bulul Hérmun ne bulul Misar. Ya tey lungkulen mool él Jurdan.

⁸ Tódô ket kdaw Dwata hegfan du béléu yóm kbong nawan dou là monolen. Ket kifuhu semngal du yóm kun sngal, mung bè yóm knihu béléen, yóm Dwata hlowil dou.

⁹ Dwata se gónóhu hofin. Yó monu mò du, “Moen de ke deng klifótem ou? Moen ni du ke tódô seflós yóm keglayamu lemwót bè yóm tey sidek nmò le béléu yó kem hohonu?”

¹⁰ Tey sidek kegnómu du bè yóm kehnê le dou. Sónmò le mon du mò dou, “Nô se yóm Dwata gónóm hemtahu yó du?”

¹¹ Moen ni du ke alì sidek keblat nawahu? Moen de ke alì sbeweg kegnómu du? Dwata he nefet nawahu, angat wen kdawu bud dmóyón du. Du se yóm lemwà dou, ne du se yóm dou Dwata.