Kem Lingón 41 - Udél Dwata: Gna Kesfasad ne Lomi Kesfasad

Lingón Dabid

¹ Ya tey kehligal le kul yó kem tau gel tmóbóng yó kem tau élél. Sal gel lenwà Dwata lu bè yóm gónón wen hlayam le.

² Gel nofin Dwata lu ne hlowilen lu. Tey któbóngen kul bè yóm kmò le nmò ta yóm tonok le, ne là kô bayaen kul bè yó kem hohon le.

³ Gel tnóbóng Dwata lu ke wen des le, gotu hkóhen yóm des gnóm le.

⁴ Mnihe bè Dwata, monu mò du, “Ó Dwata, hkoduhe béléem. Hol hkóhem dou nim desu ni, yakà denge gemsalà béléem.”

⁵ Okóm yó udél le tendo tmuled dou yó kem hohonu, mon le, “Kilón katayen anì tódô lana boluyen?”

⁶ Ke nauy le ou, lómón ke wè le ou, anì monen mò lan le mebel ke wen sidek tulónu. Bè kulék le, bud gel tulón le bè kdéen tau.

⁷ Tódô kdê yó kem tau kmutó nawa dou, gotu le sboyong gbak béléu, tey sidek kehedem le dou.

⁸ Yó mon le, “Des mit hatay yóm gnómen. Là kóen bud gebtik ne bè yóm gónón masà.”

⁹ Balù yó hem hol dou wè, yóm alì snaligu, yóm tehe gel mken béléu, deng mom hohonen ou.

¹⁰ Okóm kóm, Dwata, hol knoduhem ou. Hol hkóhem dou nim desu ni anì bnelesu yó kem hohonu.

¹¹ Tngónu se hligali béléu, abay se là kô hlusem kul ke gemmò le béléu yó kem hohonu.

¹² Lemwót bè yóm klaen dù sidek nmou, yó gónóm hlowil dou. Laen kô dù tul sónen yóm kehnóem do bè soluhem.

¹³ Hol dóyón tekuy Dwata yóm Dwata yó kem tau Israél. Laen kô dù tul sónen yóm gel kdóyón tekuy du. Hol tahu se yó.