Kem Lingón 4 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata yóm gel mfi dou. Hol bnalaem ou bè yóm ktabahu ebéléem. Kóhem dou yóm gónón sidek kegnómu du. Hol knoduhem ou, ne hnungolem dou yóm hnihu.

² Yu kem tau hmohon dou, kmò kegenen de yóm tendo kudél ye sidek etahu? Kegenen de yóm tendo ktifù ye dou là tahuhen? Kegenen de yóm tendo kmò ye kéng?

³ Ni hol hendem ye. Deng eles hetfing Dwata mò kun yóm tau tedeng kmoen. Ke tmabahe ebéléen, hnungolen ou.

⁴ Béi hegsalà mlan bè kebutem. Nahem gel hendem suloy buteng, béi tagad mudél.

⁵ Snaligem Dwata, ne dsuem yó kem dsù hyu.

⁶ Tey dê tau mon du, “Wen kô gembek mò du bélê me yóm hyu?” Ó Dwata, hegfanem bélê me yóm tey kehyuhem.

⁷ Wen tey kligal blayem dou mkay senta kligal yó kem tau bong halay tbas le ne bong tifas grép le.

⁸ Tey menek kegnómu du ke gele lemwót tungô, yakà tek són uu, Dwata, gónón laen dù hemenu bè yóm ktungóu.