Kem Lingón 39 - Udél Dwata: Gna Kesfasad ne Lomi Kesfasad

Lingón Dabid

¹ Yó mon nawaw, “Ten-gamahu yó kem gel nmou ne ksubaku anì là gemsalae. Yóm igò le nô klohoku yó kem hohonu, là kóe mudél.”

² Okóm yóm igou henek là kóe mudél, balù yóm hyu là kô tulónu du, mom temnù klóngónu.

³ Yóm igou hedem, tódô kinì lem but blututu, lómón ke wen ofi dmilóf lemen. Là gbeku du ke là mudéle, monu,

⁴ “Dwata, hefedemem dou yóm là ktahaen yóm dou klowil te tonok. Bud eles hefedemem dou yóm deng eles kbutengem yóm katayu, ne yóm tey kehlóng le yó kem dù kdawu mowil.

⁵ Yóm klowilu, tey ukol. Ne bè kóm kehedem du, lómón ke tek sudof, duhen ke tek sulék ayuf lenos.”

⁶ Yóm igoen mowil te tonok yóm tau, hol lómón ke yóm olung. Tey kmoen nmò yóm tau, laen sem gónón e kól. Tey kendengen gel sentifunen, bede là tngónen du yóm tau angat mamà du.

⁷ Duhen ni, Dwata, tau du de nefet nawahu? Tek són sem uu.

⁸ Hewaem ou bè yó kem salau. Ke moe sidek, balu yó kem tau nungel, tey kehnê le dou.

⁹ Tódóe yem bè soluhen, là kóe bud mudél, abay se uu yóm deng tmafak dou.

¹⁰ Hol béem abay bud tnafak ou ne. Denge tô matay bè yóm ksuntukem dou.

¹¹ Ke gemsalà yóm tau, sal gel sentódóem mlan bè ktafakem du. Lómón kmoem du, lómón kaba, ninut kenem yóm alì mebtes béléen. Yóm klowil tau, hol lómón kukolen ayuf lenos.

¹² Hol hnungolem dou yóm hnihu, Dwata. Hol hnungolem dou yóm kehtóbóngu béléem. Béem tódô tenngel yó kem lewoku. Yakà tauhe lawa béléem, ne tauhe milo là legen, lómón yó kem tehe fuu ekni.

¹³ Nahem tódô bayà ou anì naw bud hligal gu laanu là deng lana.