Kem Lingón 38 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, béem nudél ou bè kebutem. Béem tnafak ou bè yóm alì khéet yóm kebutem.

² Deng tey nelem gónón tódô béléu yó kem hanakem, ne kóm tdok se yóm deng smuntuk dou.

³ Lemwót bè kebutem dou gónón wen desu. Deng lengok lem tiolu lemwót bè yó kem salau.

⁴ Denge kmifus lem salà, ne là bud gbeku mbô du yóm alì ksidek keblaten.

⁵ Lemwót bè yó kem ungel nmou, yó kem haliu hennolì le lembét ne bolok.

⁶ Deng tódô sónmou hkogò bè alì kdesen. Tódô ket kdawu tendo lóngón.

⁷ Deng gnómu yóm tey kinì là lembó, laen kô dù bud gelu.

⁸ Tódóe mungoy, lómón ke denge muna. Botonge dmolong bè alì ksidek kegnómu du.

⁹ Tngónem se, Dwata, yóm alì hendeenu. Deng gotu gungolem se yóm kdê dnolongu.

¹⁰ Lómón uni mdek lem kfuhu, laen kô dù bud kgisu, deng lemobun ketngelu.

¹¹ Kem weu ne yó kem dumuhu, gotu le hlayuk béléu, kenhisik le yóm desu. Balù yó hem hol dou fes lówó, sana kehlayuk le béléu.

¹² Yó kem tau tô malu hmatay dou, deng wen holot nmò le mò alu le dou, kem tau deng eles natul le yóm keglau. Tódô snilef le kdaw matul du yóm angat ksukat le dou.

¹³ Okóm lómón ke tauhe bokong, là kô hnungolu du yó kem ifis le dou. Lómón ke umewe, là mudéle.

¹⁴ Lómón ke ou yóm tau bokong ne tau umew, là gbeku malà kul.

¹⁵ Uu se yóm dou nangat, Dwata. Uu se malà kul, yakà uu du yóm sana Dwata hol dou gónó mogot.

¹⁶ Ni se deng hnihu béléem, deng monu mò kóm, “Hol béi abay móyô ke hligal yó kem hohonu bè yóm kwen desu, ne ke heklabak le bè yóm gfau.”

¹⁷ Móyóne matay, senflósu gemnóm du yóm ketduken.

¹⁸ Okóm gel benkasu yó kem salau, ne tey kegselu bè yó kem sidek deng nmou.

¹⁹ Tey le wen yó kem hohonu. Tey kutó nawa le dou igoen laen dù salà nmou bélê le.

²⁰ Gel bnalà le sidek yó kem hyu deng nmou bélê le, ne tey khohon le dou, abay se ndau yóm tedeng.

²¹ Hol béem bayà ou, Dwata. Béi hlayuk béléu, Dwata.

²² Hol hetlasik tnóbóngem ou, Dwata, uu se yóm gel lemwà dou.