Kem Lingón 37 - Udél Dwata: Gna Kesfasad ne Lomi Kesfasad

Lingón Dabid bè yó kem tau gel mò sidek ne yóm hyu

¹ Béem kenteng mata yó kem tau gel mò sidek, ne béem nófô yó kem tonem bélê le.

² Là kóen tahà klowil le yó kem tau yó. Mkél le bè bnes, mahil le menes. Lómón kenes le yóm hulu laen dù élen, hlós le matay.

³ Holi smalig bè Dwata dé, ne nmoem yóm hyu. Tódói henek ta yóm tonok blay Dwata kóm, ne laen kô sembeweg kóm bè yó.

⁴ Ke hnebelem yóm kligalem, bè Dwata dé gónóm e mebel du, ne blayen kóm yóm hendeen nawam.

⁵ Hogotem ke Dwata klowilem. Holi smalig béléen, ne tnóbóngen u.

⁶ Ke tedeng yóm gel nmoem, hegfan Dwata bè kdéen tau. Hol lómón kehegfanen du, lómón ke nóng kdaw deng gtungó.

⁷ Hol hanayem nawam mangat du yóm któbóng Dwata kóm, béi htakas. Béem kenteng mata yó kem tau deng hyu kul kógów klowil, duhen ke yó kem tau deng wen gónón e baling yó kem sidek gel natul le.

⁸ Bê te hegmung bè ktafa nawa, ne bê te hegmung bè lebut. Olohen mit kut elem sidek yó kem yó.

⁹ Yó kem tau smalig ke Dwata, angat le gemfun bè yóm tonok tehe fasad Dwata kul. Okóm yó kem tau mò sidek, angat hdó le lu.

¹⁰ Móyón le lana lem benwu yó kem tau mò sidek. Anien ke tô hnebelem lu, là kô bud tonem kul ne.

¹¹ Okóm yó kem tau heglaan le knô le, gfun le yóm tonok tehe fasad Dwata kul, ne tilob kógów klowil le, ne tendo menek kbenwu le.

¹² Yó kem tau gel mò sidek, gel natul le ktondo le yó kem tau hyu kmò le, lel le kmutó nawa kul.

¹³ Okóm mom knuli Dwata lu, yó kem tau gel mò sidek, abay se tngónen móyón le meglà.

¹⁴ Yó kem tau sidek nmò le, dmilot le sudeng, ne bemtul le boho, tô hnatay le yó kem tau élél, ne yó kem tau tedeng kmò le.

¹⁵ Okóm mom bud kul sudeng tles hmatay kul yó kem tau mò sidek yó. Yó kem boho le, gotu tfok.

¹⁶ Mom hyu he yóm tau hyu kmoen ne tek udì kimuhen senta yóm tau mò sidek ne tey bong kimuhen.

¹⁷ Abay se angat kó Dwata bélê le yóm kgis le mebel klowil yó kem tau gel mò sidek. Okóm yó kem tau hyu kmò le, tendo nofin Dwata lu.

¹⁸ Tendo sen-gifà Dwata yó kem tau mimón du, ne laen kô dù sónen kfun le du yóm tonok tehe fasaden kul.

¹⁹ Laen kô gónó le glayam bè klowil le anien ke sidek benwu. Ne anien ke mbel tey bitil bong, sal gel wen gónó le ma.

²⁰ Okóm yó kem tau mò sidek, là kóen tahà klowil le. Móyón le lana yó kem tau gel hmohon ke Dwata. Lómón klowil bulók lem bnes, ne lómón kebel ofi, là kóen legen ktonem kul.

²¹ Ke gel le mutóng yó kem tau gel mò sidek, là kô bud bnayad le du. Okóm yó kem tau hyu kmò le, tey mahil bélê le bemlay.

²² Yó kem tau tnóbóng Dwata, gotu gfun le yóm tonok tehe fasaden kul. Okóm yó kem tau tnuleden, tódô hdó le lu ta yóm tonok yó.

²³ Yó kem tau gel hefligal ke Dwata, tey tendo gel kesgalak Dwata lan le, ne sal gel nofinen lu.

²⁴ Baluen ke tlokob le, là kô le masà, abay se deng eles nogoten lu.

²⁵ Ni denge tey tuha ne, deng tey tahà klowilu. Là kô deng wen tonu he ke tódô bayà Dwata yóm tau hyu kmoen, duhen ke gel heslaf mni ken bè kem tau yó kem ngaen.

²⁶ Yóm tau hyu kmoen yó, tey mahil béléen bemlay, ne là mgel mutóng béléen. Ne yó kem ngaen, tey le hulung tmóbóng se kul.

²⁷ Hol knogolem yóm sidek, tles nmoem yóm hyu. Ke ni se nmoem, angat le henek menwu bè yóm tonok tehe fasad Dwata kuy yó kem semfu gu béléem.

²⁸ Yakà tey hyu nawa Dwata du yóm tedeng. Là kô bayaen kul yó kem tau teneb béléen ne laen dù sónen yóm tendo kofinen kul. Okóm yóm kul lugod yó kem tau gel mò sidek, angat hdó le lu ta yóm tonok yó.

²⁹ Yó tles mfun du, yó kem tau tedeng kmò le, ne laen dù sónen yóm knô le tahen.

³⁰ Yóm tau hyu kmoen, dilô bè kudélen yóm khulungen hedem, ne laen dù mtukul nfihen.

³¹ Tendo suen lem hendemen yóm hlau Dwata, là kô knogolen du.

³² Yóm tau sidek nmoen, gel mebel lanen tô hmatay yóm tau tedeng.

³³ Okóm là kô tódô bayà Dwata du bè hohonen yóm tau tedeng yó. Anien ke niten skukum, laen kô lanen heblosok du.

³⁴ Dwata dé nefet nawahem, ne nimónem yóm kdê hlauhen. Ke yó se nmoem, angat tey kadaten kóm Dwata mlan bè keblayen du kóm yóm tonok mò gónóm nô. Angat tonem yóm kehdóhen kul bè yóm tonok yó, yó kem tau gel mò sidek.

³⁵ Wen tehe tau sidek nmoen tngónu, alì sidek klóbóen. Alì hegetahen knóen bè kdéen tau. Lómón kehegetahen knóen, lómón kegeta yóm koyu sidar tmowok bè Libanun.

³⁶ Okóm sotu kdaw, miwese bè yóm tehe gónón nô yóm tau yó, là kô bud tonu du bè yó. Benkól tô nebelu, là kô tonu du.

³⁷ Okóm hol hennagiem yóm tau hyu kmoen, yóm tau tedeng kmoen, yóm tau menek kehedemen. Tey wen semfu gu béléen.

³⁸ Okóm yó kem tau mò sidek, gotu le meglà. Senged se yó kem angat lugod le, meglà le se kul.

³⁹ Tólóng kul yó kem tau hyu kmò le, sal gel lenwà Dwata lu. Gel kenlungen lu ke gel wen gfà msut.

⁴⁰ Sal gel tnóbóngen lu, ne hewaen lu lem tdok yó kem tau gel mò sidek. Yó gónón mò du bélê le yóm yó, abay se gel le heklung béléen.