Kem Lingón 34 - Udél Dwata: Gna Kesfasad ne Lomi Kesfasad

Lingón Dabid bè yóm tey któbóng Dwata du

¹ Là kô senkóhu du yóm tendo gel keslamatu bè Dwata. Là kô tenfloku du yóm kdóyónu du.

² Tendo gel dóyónu yóm deng gendengen béléu. Yu kem tau hen-gnok, hol hnungol ye ou anì wen kligal ye.

³ Gbót ye béléu tmulón du yóm tey kegeta Dwata. Hol dóyón tekuy dé boluyen.

⁴ Bè yóm tehe knihu bè Dwata, bnalaen ou se. Gotu kóhen béléu yóm kdê gel knikou.

⁵ Gel le htóbóng béléen yó kem tau hen-gnok, ne tey kehyu nawa le bè yóm któbóngen kul. Laen kô dù gónón sidek nawa le béléen.

⁶ Gel le mni tóbóng béléen yó kem tau laen dù tmóbóng kul, ne bnalaen lu. Hewaen lu gu lem yóm kdê gónó le glayam.

⁷ Wen hógów Dwata gu bè longit gel mentey yó kem tau wen klikò le du, ne lenwaen lu bè yó kem gónón wen gfà le.

⁸ Tilów nimónem Dwata dé anì gnómem yóm tey kehyuhen. Bong kligal le kul yó kem tau gel hofin béléen.

⁹ Yake wen klikò tekuy ke Dwata yóm kdê tekuy kem kun tau. Yó kem tau mimón du, laen kô dù gónó le élél bè klowil le.

¹⁰ Balù yó kem liyun, sal wen kdaw le gel bitil. Okóm yó kem tau mimón ke Dwata, laen kô gónó le élél bè yó kem hyu bélê le.

¹¹ Ó kem weu lomi lemnok, hol hnungol ye ou. Wen toloku kuy anì wen klikò ye ke Dwata.

¹² Móyô ye kô ke gsengel nawa ye du yóm klowil ye? Móyô ye kô ke tahà klowil ye ne ke wen kligal ye?

¹³ Ke yó se sen-galu nawa ye, hol béen sidek kebkó ye, ne bê ye abay tmulón kéng.

¹⁴ Knogol ye yóm sidek, ne nmò ye yóm hyu. Hol tilów ye són gel ye mit kenek nawa bè kem dumu ye.

¹⁵ Tendo gel knudung Dwata yó kem tau tedeng kmò le. Gel hnungolen yóm ktaba le ebéléen.

¹⁶ Okóm tey kenbéen yó kem tau sidek nmò le. Ke matay yó kem tau yó, laen kô dù bud hemtulón nawa kul.

¹⁷ Bong yó kem tau tedeng kmò le, gel le tmaba ebè Dwata, ne gel hnungolen lu. Lenwaen lu gu lem yóm kdê gónó le glayam.

¹⁸ Tey moni bélê le Dwata yó kem tau wen gónón sidek kegnóm le du. Gel lenwaen yó kem tau laen dù bud nefet nawa le.

¹⁹ Sal gel wen gónón glayam yóm tau hyu kmoen, okóm sal gel lenwà Dwata gu lemen.

²⁰ Tendo bnentey Dwata anì laen dù hemenen, balù sotu tiolen ke tfok.

²¹ Yóm sidek gel nmò tau, yó se bud hatayen. Yó kem tau kmutó nawa yó kem tau tedeng nmò le, angat tnafak Dwata lu.

²² Tendo gel lenwà Dwata yó kem kun tau. Yó kem tau gel hofin béléen, hnifóten yó kem salà le.