Kem Lingón 33 - Udél Dwata: Gna Kesfasad ne Lomi Kesfasad

¹ Yó kem tau tedeng kmò ye, hol ye hligal mensag bè Dwata, yakà teyen knóón bélê ye dmóyón du. Yu kem tau gel mimón ke Dwata, hol dóyón ye se kuy.

² Hol ye slamat bè Dwata mlan bè yóm gel kenbit ye. Hol ye semngal ebéléen, hmung ye bè yó kem dumu bud gel kenbit ye.

³ Mò ye yóm lomi sngal mò sngal ye ebéléen. Hol hninggel ye hemglung ebéléen, ne hol ye hligal mensag.

⁴ Hono tahu yóm udél Dwata. Ne yó kem nmoen, hono gsalig.

⁵ Tey hyu nawa Dwata du yóm nmò tedeng. Là kóen monol yóm kbong nawahen tau, tódô lengeben klamang benwu yóm nawahen yó.

⁶ Yóm tehe kedlimun Dwata yó kem longit seglafin, tódô lemwót bè udélen. Bud lemwót bè udélen snéen yóm tehe kedlimunen yóm kdaw ne bulón ne yó kem blotik.

⁷ Ne yóm tey él mohin, deng gotu sentnuen, ne tey nelem gónón hemsù kul.

⁸ Yóm kdéen tau bè klamangen benwu, hol knikò ye Dwata. Ne tódô kdéen tau hol madat ke Dwata.

⁹ Abay se tek bè olo udélen, tódô gónón baling yóm benwu. Bud bè udélen snéen, tódô gónón baling yóm kdéen ton tahen.

¹⁰ Yóm dê atul yó kem tau mogot benwu talak tonok, gbek henseng Dwata. Hensengen sok là hyuhen anì là gfuhen.

¹¹ Okóm yó kem kun gel atul Dwata, laen kô dù sónen. Ne laen kô dù sónen snéen yóm gel nmoen.

¹² Ya tey kehligal yó kem tau bè kihu benwu ke Dwata hol kul gónó mogot. Hligal le se kul yó kem tau nélék Dwata mò kun tau.

¹³ Yó nmò Dwata, temngel gu ta bè longit ebè kdéen tau te tonok.

¹⁴ Lemwót bè yóm gónón myón kmamal, temngel elaan ebè kdéen tau nô talak tonok.

¹⁵ Benlayen lu khulung hedem, ne tódô tngónen se yóm kdê gel nmò le.

¹⁶ Là kô yó du gónón gemmò bè gida yóm tau hol geta mogot benwu ke mlan bè kgis yó kem sendaluen. Senged se yóm sendalù, là lemwóten bè kun kgis gónón gemmò se kun.

¹⁷ Là kô yó du gónó le gemmò ke bè yó kem kudà nit le sgida. Balù yóm tey kekgis le, là kô le gewà du.

¹⁸ Yóm Dwata, tendo bnenteyen yó kem tau wen klikò le du, yó kem tau gléd nawa le bè yóm là konolen yóm kbong nawahen kul.

¹⁹ Hensengen ebélê le yóm hatay. Baluen ke mbel bitil bong, sal hlowilen lu.

²⁰ Tek són Dwata yóm hol nefet nawa tekuy. Són du gónó tekuy gel heklung ne gónó tekuy gel htóbóng.

²¹ Tey hyu nawa tekuy, abay se wen yóm kut Dwata. Hol snalig tekuy abay se yóm Dwata laen kô dù belenen.

²² Ó Dwata, hol béem abay nmò sónen yóm kbong nawahem kum. Sónen uu se yóm nefet nawa me.