Kem Lingón 32 - Udél Dwata: Gna Kesfasad ne Lomi Kesfasad

Lingón Dabid bè yóm kehegselen ne bè yóm kehlifót Dwata du

¹ Hligal le kul yó kem tau deng hnifót Dwata bélê le yó kem salà le, ne ke là bud hendem Dwata du yó kem deng tehe gónó le mulé du.

² Hligal yóm tau là bud snolò Dwata du béléen yó kem sidek deng tehe gel nmoen, ne laen dù bud blóngen ebè Dwata.

³ Bè yóm là deng kehegselu, là kóen hyu klówóhu lemwót bè yóm alì seflós ktafa nawahu.

⁴ Yóm ktafakem dou, Dwata, senflósen kdaw ne kifu efet lana béléu kgisu. Lómón kegnómu du, lómón ke él kti bè yóm alì ékét kdaw.

⁵ Yó gónóm mon, deng gotu benkasu ebéléem, Dwata, yó kem salau, laen kô dù bunihu béléem. Bè yóm kebkasu du béléem yóm kdéen, deng gotu hnifótem béléu ne yó kem sidek tehe gel nmou.

⁶ Duhen yó, Dwata, yake hol le mni béléem yó kem kóm tau ke wen blat sut bè klowil le. Ke yó nmò le, baluen ke tódô dmunuk eta le yóm tey mgel, là kô gwiten kul.

⁷ Són uu yóm gónóhu e hles. Són uu se yóm lemwà dou ke wen mgel sut bè klowilu. Gungolu hmilol dou yó kem mensag lemwót bè yóm deng kegmoem, abay se uu yóm gel mofin dou.

⁸ Deng mon Dwata mò dou, “Toloku kóm he yóm lan mò loloem. Ne wen mò hlolou kóm, ne tendo wen hlauhu kóm.

⁹ Béi hungel mkél bè kudà, song mimón benklil ke wen kakangen.”

¹⁰ Yó kem tau là mimón ke Dwata, tey dê gónó le glayam. Okóm yó kem tau genléd nawa le Dwata, tendo nofinen lu mlan bè yóm kbong nawahen kul.

¹¹ Yu kem tau gulit, hol ye hligal lemwót bè yóm deng nmò Dwata bélê ye. Ne yu kem tau mimón ke Dwata, hol ye hligal mensag.