Kem Lingón 31 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, són béléem gónów hofin. Hol tnóbóngem ou anì laen dù gónów myak. Lemwót bè yóm tey ktedengem, hol lenwaem ou.

² Henklinguhem ou, hol hnungolem ou. Géhéli hetlasik lenwaem ou. Lómón ke uu yóm botu bong gónów heklung, yóm gónô hofin alì mbegel gónó le là gmafit dou yó kem hohonu.

³ Uu se yóm botu gónów heklung ne gónów hofin. Hol nalakem ou anì gewae bè ni mò gónón megdóyón yóm kóm boluy,

⁴ anì là gholote bè yó kem hohonu. Yakà tek són uu du yóm gónów hofin.

⁵ Hogotu kóm yóm klowilu, Dwata. Hol lenwaem ou, yakà uu du yóm Dwata teneb béléu.

⁶ Tey keklitu kul yó kem tau tmaba ebè yó kem dwata lennged laen dù muhen. Okóm béléu dou, són uu, Dwata, yóm dou snalig.

⁷ Lemwót bè yóm là konolen yóm kbong nawam dou gónóhu alì hligal, abay se deng tonem yóm alì keglayamu, ne deng gnómem yóm gónón lebà nawaw.

⁸ Là kô blayem dou elem hólól yó kem hohonu, deng suem ou bè yóm gónón laen dù hemenu.

⁹ Ó Dwata, hol knoduhem ou, yakà tey sidek kegnómu du. Là buden gmefet ketngelu lanu alì mkik. Là kóe bud mgel.

¹⁰ Móyóne matay bè klangagu, hukolen towoku. Lemwót bè alì ksidek kegnómu du gónów là bud mgel. Lengok gu lem tiolu.

¹¹ Tey kkuli le dou yó kem hohonu, botong kenhisik le ou yó kem dumuhu sebét. Balù yó kem weu, là kô le hloni ebéléu. Mom senyat le ou ke ton le ou bè lan.

¹² Là bud hendem le dou, lómón ke denge matay, ne lómón ke ou yóm kuleng lemusok deng bot le.

¹³ Tey dê gungolu udél le etahu, ne deng slibut dou yóm alì knikou. Deng natul le ou yó kem hohonu, natul hnatay le ou.

¹⁴ Okóm, Dwata, són uu yóm dou snalig. Yó udélu, monu, “Uu se dou Dwata.”

¹⁵ Denge nô lem hólólem efet kól elem hulin kdaw. Hol lenwaem ou bè yó kem hohonu tendo kemtes huli dou.

¹⁶ Hol hendemem yóm tau tóbóng lówóhem. Lenwaem ou mlan bè yóm kbong nawam dou là monolen.

¹⁷ Uu, Dwata gónów htóbóng. Hol hegmoem ou anì laen dù gónóhu myak. Okóm yó kem tau gel mò sidek, hol nmoem gónó le myak. Lusem lu ebè benwu yó kem tau deng matay,

¹⁸ anì là bud le mò udél yó kem tau mò kéng yó, kem tau alì hegmón, alì heklabak, tnifù le kéng yó kem tau tedeng kmò le.

¹⁹ Tey bong, Dwata, yóm alì kehyuhem. Tey kbasahem kul yó kem tau wen klikò le kóm. Deng tey bong gendengem bè yó kem tau hofin béléem igò le temngel yó kem tau bè klamangen benwu.

²⁰ Gel bnosem lu klohokem bè yóm gónón laen dù hemen le bè yó kem tau matul kul. Uu se kemlung kul klohokem anì mayuk le bè yó kem tau tmifù kul kéng.

²¹ Dóyónu Dwata, yakà deng hegfanen du béléu yóm là konolen yóm kbong nawan dou. Deng nofinen ou bè yóm tehe kundug le benwuhu yó kem hohonu.

²² Lemwót bè yóm alì ksidek klikou, botong monu, “Là bud ton Dwata dou ne.” Okóm gungolen yóm kehkoduhu béléen, ne bnalaen yóm kehtóbóngu béléen.

²³ Yu kem tau gel mò du yóm kun kóyô Dwata, hol kenbong nawa ye Dwata. Sal gel nofinen yó kem tau teneb lemolò du. Okóm yó kem tau heklabak, tey sidek ktafaken kul.

²⁴ Yu kem tau nefet nawa le Dwata, hol ye hbegel, hfól ye nawa ye.