Kem Lingón 30 - Udél Dwata: Gna Kesfasad ne Lomi Kesfasad

Lingón Dabid yóm kehfun le du ke Dwata yóm Gónô hdà le béléen

¹ Tey kdóyónu kóm, Dwata, lemwót bè yóm deng kehewaem dou. Là kói móyô ke gemmò le béléu yó kem hohonu.

² Ó Dwata yóm sana dou Dwata hol gónó mogot, denge mni tóbóng béléem, ne gotu hkóhem béléu yóm desu

³ anì là hlóse elem lebeng. Deng bud hlowilem ou, Dwata, anì là hlóse elem hatay.

⁴ Yu kem tau gel mimón ke Dwata, hol sngal ye yóm sngal dmóyón ke Dwata. Hol dóyón ye yóm kun boluy alì mólós.

⁵ Yóm kebuten, tek likóten, okóm bè yóm klawi te mowil, tendo gnóm te yóm kehyuhen. Baluen ke suloyem buteng mkik, okóm budi mulék hligal ke hlafus.

⁶ Bè yóm tehe kehyu klowilu, yó monu, “Laen dù bud hemseng dou ne.”

⁷ Yóm kehyuhem ebéléu, Dwata, gónón mbegel kdau lómón kbegelen bulul. Okóm tikóng tebelem ou, deng mom tey sidek klikou.

⁸ Uu se, Dwata, gónów deng htóbóng. Hkoduhe béléem, yó monu mò kóm,

⁹ “Ke mataye, ke denge nô lem lebeng, tedu se gutahem béléu du? Gbek yóm lówóhu deng baling kfung kô dmóyón kóm? Gbeken kô tmulón du bè klamangen benwu yóm tey ktenebem?

¹⁰ Hol hnungolem ou, Dwata, hol knoduhem ou. Hol tnóbóngem ou, Dwata.”

¹¹ Yóm klangagu, deng henbalingem kligalu madal. Deng gotu kóhem yóm nes langag leseku, ne tenlesem kligal.

¹² Yó se gónóhu semgal yóm sngal dmóyón kóm, ne là kóe tódô yem. Ó Dwata, yóm Dwata hol gónó mogot, ne laen kô dù tul sónen yóm kdóyónu kóm yó.