Kem Lingón 3 - Udél Dwata: Gna Kesfasad ne Lomi Kesfasad

Lingón Dabid yóm kdaw tehe kehlóyen ke Absalum

¹ Ó Dwata, tey dê yó kem hohonu, tey le dê yó kem tau kmutó nawa dou.

² Tey kwen le mudél etahu, mon le, “Là kô lenwà Dwata du yóm tau yó.”

³ Okóm, Dwata, uu se kemlung hmilol dou, uu se hegmò dou, bud uu se tendo hfól nawahu.

⁴ Denge hkodu bè Dwata, ne kendel bnalaen ou lemwót ditu bè yóm bulul gónóhen gel nô.

⁵ Lemwót bè yóm kofin Dwata dou gónón tilob ktungóu. Ne bè yóm kebtiku, laen kô dù hemenu.

⁶ Bè yóm sfolò libu kem hohonu semibut dou, là kóe na a likò kul.

⁷ Géhéli Dwata yóm Dwata hol gónóhu mogot, hol lenwaem ou. Hol tnafakem lu yó kem hohonu. Kóhem bélê le yóm kgis le hemsidek dou.

⁸ Són béléem se, Dwata, gónón lemwót yóm kegmò me bè yó kem hohon me. Dwata he hol tmóbóng yó kem kóm tau.