Kem Lingón 29 - Udél Dwata: Gna Kesfasad ne Lomi Kesfasad

Lingón Dabid

¹ Yu kem hógów Dwata nô bè longit, hol dóyón ye Dwata. Hol dóyón ye yóm tey kegetahen ne yóm tey kekgisen.

² Hol dóyón ye yóm tey kegetahen yóm kun boluy Dwata. Dóyón ye Dwata bè yóm tey keklóónen bè yóm klaen dù belenen.

³ Yóm kudél Dwata, gungolem gu ta mohin. Ne heték yóm Dwata alì geta. Yóm udélen lemungkul gu ta yóm tey lewók mohin.

⁴ Tey mfasang yóm kudél Dwata, yóm kudél yóm Dwata alì geta.

⁵ Gbeken temfok yó kem koyu sidar alì mtétél, tenfoken yó kem koyu sidar bè Libanun.

⁶ Gbek Dwata hefkak kul yó kem bulul bè Libanun, lómón kehkak le ngà safì. Ne yóm kehetoen Bulul Hérmun, hol lómón kehetò yóm ngà safì logi.

⁷ Yóm kudél Dwata, hol lómón ke kemfô leték.

⁸ Ne gbeken hlinol yóm benwu là hyu menwu du. Gbek Dwata hsinsig du yóm benwu là hyu menwu du bè benwu Kadis.

⁹ Yóm kudél Dwata, gbeken hkingò yó kem koyu ok, ne gbeken htosok yó kem doun koyu lem dlag. Bè yó bè Gónóen, gotu le mensag yóm kdê le, mon le, “Tey kegeta yóm Dwata.”

¹⁰ Dwata se mogot kul yó kem él dmunuk. Ne laen kô dù tul sónen yóm hol kegetahen.

¹¹ Dwata se bemlay kul kgis yó kem tauhen. Du se bemlay kul kenek nawa.