Kem Lingón 28 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, ebéléem yóm gónóhu e tmaba, uu se yóm henged botu mbegel gónów gel heklung. Hol béem abay là hnungol ou. Ke là hnungolem dou, hol lómón ke ou yóm tau móyón matay.

² Hol hnungolem yóm kehkoduhu béléem yóm igou mni tóbóng béléem, yóm igou hdà hólólu edyó bè yóm kóm gónó nô.

³ Béem homong dyol ou bè yó kem tau gel mò sidek. Tey tilob kudél le bè kem dumu le sebét, okóm yóm lem hendem le, matul le mò sidek bélê le.

⁴ Tnafakem lu lemwót bè yó kem sidek deng gel nmò le. Tnimbangem yóm kbalaem du yóm sidek gel nmò le anì hol snged keblaten bè yóm sidek deng kul nmò. Hol hegnómem kul ksideken yóm deng nmò le bè kem dumu tau.

⁵ Là kô dog kenmón le du yóm kdê deng nmò Dwata, yóm kdê deng nmò tdoken. Yó gónóm mon, angat gotu genlà Dwata lu lómón kegbaen yóm gónô deng bolok, là kô bud gbek hdà du.

⁶ Dóyónu Dwata, abay se deng gungolen yóm alì kehkoduhu béléen.

⁷ Dwata yóm gel temgel dou, ne bud du se kemlung dou bè yó kem sidek. Hol lemwót lem but blututu yóm ksaligu du. Tendo tnóbóngen ou, ne ya tey kligalu. Gel utómu lingón yóm kdóyónu du.

⁸ Yóm Dwata, gel nofinen yó kem kun tau, ne gel hatuen yóm tau hol geta deng kun nélék.

⁹ Ó Dwata, hol hewaem yó kem kóm tau. Tnóbóngem yó kem tau Israél, kem tau deng kóm nfun. Nalakem lu lómón yóm tau semgyok ubiha, ne laen kô dù tul sónen yóm ksiwihem kul yó.