Kem Lingón 27 - Udél Dwata: Gna Kesfasad ne Lomi Kesfasad

Lingón Dabid bè yóm kdóyónen ke Dwata

¹ Dwata se henged layagu, ne du se lemwà dou. Yó gónóm mon, laen dù bang knikou. Tendo kenlungen ou bè yó kem gfà, yó gónóhu là bud likò.

² Ke nuluk le ou yó kem tau gel mò sidek na le e tô hnatay ou, mom lu tles wen gbunuen.

³ Anien ke deng snibut le ou yó kem tey sendalù wen, là kóe na a likò. Anien ke nundug le ou yó kem hmohon dou, mom mbegel yóm ksaligu ke Dwata.

⁴ Sotu alì gel hnihu bè Dwata, tek sotu yóm hol nóyóu béléen. Yó hnihu, bè klawihu mowil ke tendohe nô lem gónóen, anì tendo gtanudu yóm tey keklóónen, ne anì tendohe hesgalak béléen.

⁵ Ke wen gfà sut béléu, són du gónóhu e hles. Bnosen ou lem yóm kun Gónô, lómón ke nkayen ou eta yóm léhék geta anì là gafit le dou.

⁶ Yó gónóhu gemmò bè yó kem hohonu hmilol dou. Ya tey kligalu, botonge mensag bè yóm kedsuu ebè Dwata bè Gónóen, lelu lemingón ebéléen lanu dmóyón du.

⁷ Hol hnungolem ou, Dwata, soke tmaba ebéléem. Hol knoduhem ou, ne bnalaem ou.

⁸ Deng monem se mò dou, “Na hlonihi sen.” Ne deng monu se mò kóm, “El, hlonihe ebéléem, Dwata.”

⁹ Hol béem abay henbnos ou. Béem lenbut ou, béem tódô hulék ou. Són sem uu yóm gónóhu gel htóbóng. Béem bayà ou tek sotu, Dwata. Són sem uu lemwà dou.

¹⁰ Anien ke tódô bayà le ou yó kem tuhahu, okóm ke Dwata, tendo sen-gyoken ou.

¹¹ Ó Dwata, hol tolokem dou yóm nóyô hmoem dou. Hol sen-galakem ou bè lanu anì là gesyate, yakà teyen wen yó kem hohonu.

¹² Hol béem abay tódô bayà ou bè yó kem hohonu. Tódô dnelem le ou hkawang, lel le mifis dou.

¹³ Tódô tngónu là kô hatayu du yó kem nmò le béléu yó. Angat hton Dwata dou he yóm tey kehyu nawan ebéléu bè yóm klawihu mowil talak tonok.

¹⁴ Hol snalig ye Dwata se kuy, ne hol hentahu ye. Hol bê ye abay kendel htakas. Hol snalig ye Dwata.