Kem Lingón 26 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hegfanem yóm klaen dù salau, abay se tedeng yóm gel nmou. Là kóen monol yóm gel ksaligu kóm.

² Tilówem ou, Dwata, hol hen-getem smisif dou. Tenngelem yóm nô lem but blututu, ne yóm nô lem hendemu.

³ Yakà yó du tendo malak dou yóm kbong nawahem là monolen, ne tendo lolou yóm ktahuhen.

⁴ Là kóe gel mung seyón bè yó kem tau mò kéng, ne là se kóe gel slomong bè yó kem tau olon nô te kulit yóm kehtahu le.

⁵ Tey keklitu du yóm gel kestifun le yó kem tau sidek gel nmò le. Là kóe móyô segmung kul bè yóm gel nmò le.

⁶ Nolobu tdoku mò gónów hegfan yóm klaen dù salau. Mógówe lemibut yóm gónó me gel demsù ebéléem, Dwata,

⁷ lingónu yóm lingón dmóyón kóm, ne tulónu yóm kdê hentaw ton deng nmoem.

⁸ Tey bong nawahu du yóm Gónóem, Dwata, yóm gónóhen gfan yóm keslinangem.

⁹ Béem hmung ou bè yóm kul gónó e kól yó kem tau gemsalà, dalang se bè yó kem tau monok, béem hmung ou golu bélê le.

¹⁰ Yó kem tau yó, senflós le matul mò sidek, ne senflós le ma filak mò wa nawa le.

¹¹ Okóm béléu, són lolou yóm tedeng. Hol lenwaem ou hlanem bè yóm kkoduhem dou.

¹² Deng hol nô bè nawahu mimón ke Dwata, ne angat dóyónu bè gónón wen.