Kem Lingón 25 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, ebéléem yóm gónów mni.

² Tey ksaligu kóm, Dwata. Béem abay henyak ou, duhen ke hefligalem yó kem hohonu bè yóm là kegmou.

³ Laen kô dù gónón myak kun yóm tau smalig béléem, okóm yó myak yó kem tau snukaten kem dumun tau.

⁴ Hol hegfanem dou, Dwata, yóm lan hloloem dou. Tolokem dou yóm kóm lan.

⁵ Hol nalakem ou lemwót bè yóm ktahuhen lemwót béléem, ne hol tolokem ou, abay se uu yóm Dwata deng gel lemwà dou. Tódô knoyungu kdaw tendo smalig béléem.

⁶ Hol hentulónem nawa, Dwata, yóm kbong nawam tau ne yóm kkodum tau, yóm tehe kehegfanem du bè gnan kdaw ekni.

⁷ Hol hnifótem dou yó kem salà tehe nmou bè yóm klomihu tau. Lemwót bè yóm là konolen yóm kbong nawam, hol hentulón nawam ou, Dwata, abay se uu yóm Dwata alì hulung kmodu.

⁸ Tey hyu yóm Dwata, ne tey tedeng yó kem gel nmoen. Gel toloken yó kem tau gemsalà yóm lan mò lolò le.

⁹ Toloken yó kem tau hulung heglaan yóm tedeng, ne toloken kul yóm kun lan.

¹⁰ Yó nmò Dwata, bè yó kem tau là mulé du yóm deng tehe senfasad le, nalaken lu hlanen bè yóm là konol yóm kbong nawahen kul ne hlanen bè yóm kteneben bélê le.

¹¹ Ó Dwata, hol hnifótem dou yóm kdê salau mò gónón megdóyón boluyem.

¹² Yóm tau wen klikoen ke Dwata, hegfan Dwata béléen yóm lan mò loloen.

¹³ Angat mdengen klowil le, ne angat gfun kem ngà le yóm tonok le.

¹⁴ Yóm keswè ke Dwata, són yó kem tau wen klikò le du. Lu se gónón hetngón du yóm deng tehe senfasad le yó kem tehe fù le ekni.

¹⁵ Són ebè Dwata gónów temngel mò tmóbóng dou, tek són sem du gembek lemwà dou lem holot yó kem hohonu.

¹⁶ Beklili ebéléu, Dwata, ne hol knoduhem ou, yakem wen sem dumuhu, lelen tey sidek kegnómu du.

¹⁷ Hol kóhem dou yóm kdê sbeweg lem hendemu. Hol lenwaem ou bè yóm kdê gónów glayam.

¹⁸ Tenngelem, Dwata, yóm ksidek kegnómu du ne yóm tey keglayamu. Hol hnifótem ou bè kdê yó kem salau.

¹⁹ Tonem yóm tey kwen yó kem hohonu, ya tey sidek kutó nawa le dou.

²⁰ Nofinem ou, ne lenwaem ou lem hólól le. Béem nmò gónów myak ke lu gemmò, yakà uu du gónóhu e mlo.

²¹ Yóm dou kgulit ne dou ktedeng yóm gel mofin dou, abay se uu yóm nefet nawaw.

²² Ó Dwata, hol nsokem yó kem kóm tau Israél lem yó kem gónó le glayam.