Kem Lingón 24 - Udél Dwata: Gna Kesfasad ne Lomi Kesfasad

Lingón Dabid bè yóm hol dandónen geta

¹ Dwata se mfun du yóm klamangen benwu ne yóm kdéen nô lemen. Ne kdéen tau nô tahen, hono kun.

² Bè yóm tehe kedlimunen du yóm tonok, tódô suen ta yóm tey él nelem fi laan tonok. Hdaen lem mohin yó kem tud blungónen mò hembegel du.

³ Tau du de knóón bang mneged bè yóm kun bulul Dwata? Tau du de knóón bang husek elem yóm kun Gónô?

⁴ Yó knóón mò du, duhen yó kem tau laen dù belenen yóm kekdol le ne yóm kehedem le. Là tmaba le ebè yó kem dwata lenbù nmò, ne là tódô le mò fasad hkawang.

⁵ Tey angat kkudung Dwata kul yó kem tau yó, ne angat lenwaen lu ke wen gel gfà le. Bè yóm kkukumen kul, laen dù salà tonen bélê le.

⁶ Lu se yó kem tau knóón hloni ebè Dwata yóm Dwata kun hentahu tehe Jakub.

⁷ Hol hennas ye dé yó kem bak tikeb yóm lósól Gónô Dwata. Hol hennas ye dé yó kem sana beng tganay bè Gónô Dwata. Angat husek elemen yóm hol dandónen geta.

⁸ Tau du se yóm hol dandónen geta yó? Du se yóm Dwata hol gónó mogot, yóm hol kemgis, yóm hol gembek, yóm tendo gel gemmò bè yó kem hohonen.

⁹ Hol hennas ye dé yó kem bak tikeb yóm lósól Gónô Dwata. Hol hennas ye dé yó kem sana beng tganay bè Gónô Dwata. Angat husek elemen yóm hol dandónen geta.

¹⁰ Tau du de yóm hol dandónen geta yó? Du se yóm Dwata laen dù gónón là gemmò bè yó kem hohonen. Du se yóm hol dandónen geta.