Kem Lingón 23 - Udél Dwata: Gna Kesfasad ne Lomi Kesfasad

Lingón Dabid yóm tey ktilob kesegyok Dwata du

¹ Dwata yóm tendo semgyok dou. Gotu blayen dou yó kem wen muhu du.

² Yóm kesegyoken dou, hol lómón ke yóm tau tilob kesegyoken yó kem ógófen. Sal gel hótóben lu bè yóm gónóhen mabù bnes efet le tódô tmakas, ne tódô le kem hlilil hegnô. Sal gel nalaken lu ebè yóm él tikaw mò gónóhen hinum kul. Hol lómón yó se kesegyok Dwata dou.

³ Sal gel hnomihen kgisu. Ne tendo sen-galaken ou anì glolou yóm lan tedeng, anì hol megdóyón yóm kun boluy.

⁴ Baluen he ke mlane lem yóm hol gónón alì mget kifu, là kóe likò, Dwata, abay se elesi nô béléu. Yó se gónón menek kegnómu du lemwót bè yóm tendo kesgalakem dou ne yóm kofinem dou.

⁵ Baluen ke deng le moni yó kem hohonu, mom htonem kul yóm kkayem dou ken. Lómón ke ou yóm tau hol nadatem mauy béléem. Laen selen yóm tey kligalu bè yóm nmoem béléu.

⁶ Tngónu là kóen skó yóm któbóngem dou dalang se yóm kkoduhem dou efet kól bè kukol towoku. Ne sok bangen hto yóm hutusem dou, tódóe hlós menek béléem bè yóm kóm gónô. Ne laen kô dù tul sónen yóm knóu dyó béléem.