Kem Lingón 22 - Udél Dwata: Gna Kesfasad ne Lomi Kesfasad

Lingón Dabid yóm alì sidek kebà nawahen, ne yóm tey kdóyónen ke Dwata

¹ Ó Dwata, Dwatahe, moen de ke tódô bayaem se ou du? Tey ktabahu ebéléem anì tnóbóngem ou, okóm là kô dog bnalaem dou.

² Ke kemdaw, tey ktabahu kóm, Dwata, okóm là kô kenmónem dou. Bude tmaba ebéléem ke kifu, là se gnómu du ke mdengen kehegnóu.

³ Igoen se uu yóm Dwata laen kô dù belenen, myón bè yóm gónón myón kmamal. Uu se yóm tendo dóyón yó kem tau Israél.

⁴ Tey tehe ksalig le kóm yó kem fù me. Tey kegléd nawa le kóm, ne uu se lemwà kul.

⁵ Tmaba le ebéléem, ne gewà le bè yó kem gfà le. Tey kegléd nawa le kóm, ne laen kô gónó le gsel du.

⁶ Okóm yóm dou, lómón ke là bude tau, lómón ke denge baling kuled. Tey khisik le dou yóm kdéen tau, ne lel le semdekà dou.

⁷ Kdê yó kem tau mton dou, tey sidek kehnê le dou. Mangà le dilak ebéléu, lel le hising.

⁸ Yó mon le, “Tey ksaligem bè Dwata, moen se ke là lenwaen kóm? Ke hyu nawa Dwata ebéléem, moen de ke là tnóbóngen kóm?”

⁹ Uu se, Dwata, tehe hewà dou lem blutut yê, laen kô dù hemenu. Deng gel nofinem ou bè yóm kegenu hanà ngà, laen kô dù tódô béléu.

¹⁰ Tey kegléd nawahu kóm tódô lemwót bè yóm kdaw ksutu gu bè yê. Laen kô dumu Dwata hentahuhu, són uu.

¹¹ Hol béi hlayuk béléu. Deng wen sidek moni ebéléu, ne laen kô bang tau tmóbóng dou.

¹² Deng snibut le ou yó kem hmohon dou, hol lómón ke safì le tudu. Gotu snibut le ou, hol lómón ke safì le tudu alì lóbô lemwót bè benwu Basan.

¹³ Mngel le mnanga ebéléu, lómón ke liyun le, nódód nsék le ou.

¹⁴ Laen kô dù bud gelu ne, tódô lana, hol lómón ke él mkok bè tonok, tódô mneb. Yó kem tiolu, gotu slius. Hol lómón kegnómu du lem but blututu, lómón knò tolu.

¹⁵ Gotu mékéng lem baku, tódô demket lem hlalu dilaku. Tey, Dwata, deng tódô bayaem ou matay masà lem kfung.

¹⁶ Gotu senibut le ou yó kem tau mò sidek. Lómón ke slomong tey dê ohu lóbô, gotu le hloni ebéléu. Gotu nsék le sigelu ne tihu.

¹⁷ Maan kegfan tiolu. Tódô le teneng temngel dou yó kem hohonu.

¹⁸ Ne hlan le bè atù kwa le nesu ne sensólól le.

¹⁹ Ó Dwata, béi hlayuk béléu, géhél tnóbóngem ou.

²⁰ Lenwaem ou bè bak sudeng yó kem hohonu. Hol béem blay klowilu bè yó kem ohu lóbô yó.

²¹ Lenwaem ou bè yó kem liyun. Laen kô dù gmou bè yó kem safì tudu alì lóbô.

²² Angat gel tulónu bè yó he kem dou kwen yóm deng gendengem béléu. Gel dóyónu uu lem blóng le, yó monu mò kul,

²³ “Hol dóyón ye Dwata, yu kem tau likò du. Hol nadat ye Dwata, yu kem semfu gu bè Jakub. Hol ye tmaba ebéléen, yu kem tau Israél.

²⁴ Là kô tódô bayaen kul yó kem tau élél, sal gel kenmónen lu ke wen gónó le glayam. Là kô knogolen kul, mom bnalaen lu ke tmaba le ebéléen.”

²⁵ Bè yóm gel kestifun me tmaba ebéléem, Dwata, yóm kdê me, tey kdóyónu kóm lemwót bè yóm deng nmoem. Dsuu ebéléem yóm tehe fasadu kóm lem blóng yó kem tau gel tmaba ebéléem.

²⁶ Bè yóm kdaw yó, tey kehdengen le mken yó kem tau élél. Ne tey kdóyón le ke Dwata yó kem tau hloni ebéléen. Hol laen kô dù tul sónen yóm kehyu Dwata klowil le.

²⁷ Angat gtulón nawa le Dwata yóm kdéen tau bè klamangen benwu. Gotu le semfulék ebéléen yó kem tau lemwót bè ket benwu talak tonok, Kdéen kay but tau talak tonok, gotu le tmaba ebéléen.

²⁸ Dwata se yóm hol dandónen geta, gotu knamalen klamangen benwu.

²⁹ Yó kem tau hegeta knô angat le gotu heglaan béléen. Laen kô dù tau te tonok ke là mtuden bukol bè soluhen.

³⁰ Yó kem tau hulin kdaw, gotu le mimón béléen. Bud tles tulón le se kul bè kem lugod le yóm deng nmò Dwata.

³¹ Balù yó kem tau là dengen sut he, angat wen tmulón du kul. Yó angat tulón le kul, mon le, “Deng lenwà Dwata ne yó kem kun tau.”