Kem Lingón 21 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, tey kehligalen yóm tau hol geta lemwót bè yóm kóm kgis. Tey kehligalen mensag lemwót bè yóm kehegmoem du.

² Deng blayem du yóm kun kóyô. Deng gotu bnalaem yóm hnihen.

³ Deng hnódóhem bè yóm kuléken, mung du yóm tey tóbóng, ne wen kuruna nmò le bè tahu blówón suubem bè kuluhen.

⁴ Deng mni béléem anì hlowilem, ne tahu se, bnalaem yóm hnihen yó. Laen kô dù tul sónen yóm keblayem du klowil.

⁵ Deng tey kegetahen lemwót bè yóm kehegmoem du. Lemwót béléem yóm tey keklóónen ne yóm tey kegetahen.

⁶ Laen kô dù sónen yóm któbóngem du. Tey kehefligalem du lemwót bè yóm kmungem béléen.

⁷ Yakà són Dwata snalig yóm tau hol geta. Lemwót bè yóm là konolen yóm kbong nawa Dwata du yóm Dwata hol Dandónen Geta, yó gónón là tlokob yóm tau hol geta.

⁸ Ó Dwata, angat gotu kenfóem yóm kdê hohonem. Yóm alì kekgis sigel kwananem gónóm gemkfô kul yó kem tau kmutó nawa kóm.

⁹ Bè yóm ksutem na a gemlà kul, lómón kmoem kul yóm tey ofi bong. Gotu kenem lu lemwót bè alì kebutem kul.

¹⁰ Angat gotu genlaem yó kem ngà le dini talak tonok, ne laen kô dù bud semfu gu bélê le.

¹¹ Baluen ke wen sidek atul le etahem, laen kô gónón e kól yóm atul le yó.

¹² Abay se bè yóm kton le du yóm kehdoem du ebélê le yóm kebtulem bohohem, tódô le gotu mlóy.

¹³ Tey kdóyón me kóm, Dwata, bè yóm tey kekgisem. Sngal me ne dóyón me yóm tey kfasangem.