Kem Lingón 2 - Udél Dwata: Gna Kesfasad ne Lomi Kesfasad

Lingón bè yóm tau hol geta deng nélék Dwata

¹ Kihol le gel tô matù ke Dwata yó kem tau bè klamangen benwu? Kiholen dê gel tô atul le? Yakem wen se gónón e kól.

² Ne yó kem tau hol geta bélê le, deng le eles htigel mit sgida. Ne natù le Dwata ne yóm tau hol geta deng néléken.

³ Yó udél le, “Hebkas tekuy ne bélê le. Hewà tekuy lem hólól le.”

⁴ Bè yóm kungol Dwata du ditu bè yóm gónón myón kmamal bè longit yóm udél le yó, mom knulihen lu. Hennéen yóm atul le, atul laen dù olò gónón e mefet.

⁵ Ominen mudél kul mung du lebuten. Ya tey sidek kehlikoen kul bè yóm kebuten.

⁶ Yó udélen ebélê le, “Ngem yóm tau deng kenbê ye mò mogot kuy, deng hyónu bè yóm dou bulul Sayun mò mogot benwu.”

⁷ Ne angat mudél se kun yóm tau deng hyón Dwata yó, yó monen, “Heglalagu bélê ye yóm deng tehe mon Dwata mò dou, yó tehe monen, ‘Uu yóm hol dou ngà. Bè nim kdaw ni kehetngónu du ne yóm kmaem dou.

⁸ Mnihi béléu dé anì blayu kóm yóm kdéen benwu talak tonok. Angat kóm funen yóm klamangen.

⁹ Ke wen kembê du yóm kogotem kul, gotu genlaem lu. Yó kmò keglaem kul, lómón ke bnogulem bala tók yóm kuleng tonok, gotu lemusok.’ ” Yó se udél Dwata ebè yóm tau tehe néléken mò mogot benwu.

¹⁰ Duhen yó, yu kem tau hol geta mogot benwu yóm kmoen ni, hol hnungol ye dé yóm eles hetgamahu kuy. Hol henknol ye yóm monu ni.

¹¹ Hol nmò ye yóm kóyô Dwata bélê ye, mung du yóm klikò ye du. Mo ye mom kenkel dé

¹² bè yóm keheglaan ye béléen. Déke kendel msut lebuten, ngem kà tódô ye matay mekto. Tey kehligal le kul yó kem tau tendo gel hofin béléen.