Kem Lingón 18 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, tey kbong nawaw kóm. Uu yóm gel hekgis dou.

² Dwata se dou botu gónó heklung, gónóhu hofin, ne du se lemwà dou. Dwata se yóm dou botu gónó e mlo. Du se gónów heklung, kun kgis hewà dou, ne du se dou gónó hofin hol mbegel.

³ Tmabahe ebè Dwata, yóm knóón sendóyón, yakà gel lenwaen ou lem hólól yó kem hohonu.

⁴ Yóm hatay, hol lómón ke fét bkes bè lówóhu, ne hol lómón ke dunuk bong kmifus tahu.

⁵ Lómón ke deng nféten ou hatay. Lómón ke deng wen holoten suen bè lanu.

⁶ Okóm bè yóm alì ksidek kegnómu du, tmabahe ebè Dwata, htóbónge béléen. Tahu se, hnungolen ou bè yóm kun gónó nô. Gungolen yóm tey kehkoduhu béléen.

⁷ Lemwót bè yóm alì kebut Dwata yó kem hohonu, tódô leminol, ne megsinsig tonok, botong kmingò yó kem but bulul lemwót bè yóm alì kebut Dwata.

⁸ Hol lómón ke wen kebel semfut gu lem ilungen, ne lómón ke wen ofi msut gu lem baken, mung du bala ofi kemyóngón.

⁹ Hennasen longit, ominen mnaul elaan. Ya tey kifu mget gónón mdà.

¹⁰ Wen sotu hógówen alì kemgis snakayen boluyen sirubim. Móyóng, ne tey kehlóngen mung bè balu lenos.

¹¹ Wen tey kifu mget nmoen hmilol du, hono yóm tey lobun mfól mom hitem, hono él nô du.

¹² Ya tey keslinangen, tódô sut gu lem yó kem lobun. Hkulónen bulók kulón, mung du bala ofi.

¹³ Heték Dwata gu bè longit, mensag yóm Dwata hol dandónen geta.

¹⁴ Gentien yó kem hohonen, ne gotu le sekla. Ya tey kehsilaen du, botong le mlóy.

¹⁵ Lemwót bè kbólówem yó kem hohonem, Dwata, bè yóm tey kehtéem kul, botong gfan sokol mohin dalang se tud blóngón tonok.

¹⁶ Sigelen se mogot dou lemwót gu ta, ne nkayen ou gu lem yóm tey él nelem.

¹⁷ Lenwaen ou lem hólól yó kem hohonu alì mbegel, kem hohonu alì kmutó nawa dou, lel le tey kemgis sentahu.

¹⁸ Bè yóm kdaw laen dù gmou, kulel se kul kundug dou yó kem hohonu, okóm Dwata se temgel dou.

¹⁹ Nwiten ou ebè yóm gónón laen dù hemenu. Lenwaen ou, abay se maan nawahen béléu.

²⁰ Deng tey któbóng Dwata dou lemwót bè ktedeng nmou. Lemwót bè yóm klaen dù deng sidek nmou gónón hyu kbalaen dou.

²¹ Abay se deng lolou yóm kun lan Dwata, ne là kô knogolu du ke tô nmou yóm sidek.

²² Abay se yó kem hlau Dwata, là kô klifótu kul. Là kô knogolu du yó kem hloloen kum.

²³ Laen dù gónóhu mulé du. Deng senyahu yóm sidek.

²⁴ Yó gónóm mon, deng tey któbóng Dwata dou lemwót bè yóm ktedeng nmou, ne lemwót bè yóm klaen dù sidek tonen béléu.

²⁵ Ó Dwata, teyi teneb bè yó kem tau teneb béléem. Ne teyi hyu bè yó kem tau hyu ktonem kul.

²⁶ Bè yóm tau laen dù belenen, bud hegfanem béléen se yóm kóm klaen dù belen. Okóm bè yó kem tau sidek nmò le, bud sidek se nmoem bélê le.

²⁷ Sal gel lenwaem yó kem tau hulung heglaan, okóm yó kem tau hegeta knô, gel heglaanem lu.

²⁸ Ó Dwata yóm Dwata hol gónóhu mogot, uu se dou layag. Tendo hlayagem yóm gónón kmifu béléu.

²⁹ Lemwót bè yóm kehekgisem dou, gbeku gemlà yóm tey lumbuk sendalù. Ne gbeku mkaf balù kihu beng hmilol yó kem syudad.

³⁰ Yóm kun klan Dwata, hono tedeng. Sal dohò ke wen fasaden. Dwata se klung yó kem tau gel hofin béléen.

³¹ Laen kô dù dumu Dwata, són yóm Dwata hol gónó mogot. Laen dù dumu botu gónó heklung, són yóm kut Dwata.

³² Du se yóm Dwata tendo hekgis dou, ne tendo mentey dou bè lanu anì laen dù hemenu.

³³ Tey kehekgisen yó kem tihu lómón kgis ti uhu, ne yó gónóhu gembek mlan ta yó kem tfusù bulul.

³⁴ Toloken ou bè gida anì gbeku bemtul yóm boho nmò le bè tembaga.

³⁵ Yóm deng kehewaem dou, lómón ke yó se klungu. Sigel kwananem semflós hdà dou, ne yóm któbóngem dou gónóhu alì gboluy.

³⁶ Deng hlamangem yóm lan hloloem dou, yó gónów là tlidus.

³⁷ Deng ktesu yó kem hohonu, ne gafitu lu. Là kóe mulék efet gotu genlau lu.

³⁸ Gotu himotu lu, ne là kô le bud gebtik, gotu le masà laan tihu.

³⁹ Deng hekgisem ou bè gida, Dwata. Lemwót béléem gónó le là gemmò béléu yó kem hohonu.

⁴⁰ Gotu hlóyem yó kem hohonu. Deng gotu genlau yó kem tau kmutó nawa dou.

⁴¹ Tey ktaba le anì wen tmóbóng kul, okóm laen dù tau sut mò lemwà kul. Tmaba le ebè Dwata, okóm là kô bnalaen kul.

⁴² Deng gotu bnibuu lu lómón kfung mung holis bè lenos. Lómón ke fól yóm kbotu kul.

⁴³ Deng lenwaem ou, Dwata, bè yó kem tau gel tmifù dou. Ne deng bud nmoem ou mò mogot kem benwu, ne deng le mogot béléu yó kem tau là deng dou hnikót tngón du.

⁴⁴ Uni le mungol dou, tódô henmung nimón le ou. Gotu le heglaan béléu yó kem tólóng tau.

⁴⁵ Balù udì ke wen bud klóbô le, tódô setbol kkel le igò le hewà gu bè yóm gónó le hofin.

⁴⁶ Mowil yóm Dwata. Dóyónu yóm gónóhu heklung alì mbegel. Hegetahu yóm dou Dwata yóm Dwata gel lemwà dou.

⁴⁷ Du se Dwata fen meles yó kem hohonu. Heglaanen yó kem tau bè dumu benwu mò hogoten dou,

⁴⁸ ne lenwaen ou lem hólól yó kem hohonu. Tey kehegetahem dou, Dwata, senta yó kem hohonu. Deng lenwaen ou lem hólól yó kem tau mahil hmatay tau.

⁴⁹ Lemwót bè nim nmoem ni, Dwata, yó gónów dmóyón kóm lem blóng yó kem tau bè tólóng benwu, ne lingónu yóm lingón dmóyón kóm.

⁵⁰ Deng dê dulékem ne hegmò dou, yóm tau hol geta deng nélékem. Ne tendo hegfanem béléu yóm là konolen yóm kbong nawam dou. Laen dù tul sónen yóm kbong nawahem dou efet kól bè yó kem lugodu.