Kem Lingón 16 - Udél Dwata: Gna Kesfasad ne Lomi Kesfasad

Lingón Dabid yóm kgel nawahen ke Dwata

¹ Ó Dwata, hol nofinem ou. Són uu snaligu mò gónóhu heklung.

² Yó monu mò ke Dwata, “Uu se yóm Dwata gónóhu mogot. Hono lemwót béléem yóm kdéen hyu nô béléu.”

³ Tey gulit nmò le yó kem tau teneb le bè kehtahu le. Tey hyu nawahu ke nóe lem blóng le.

⁴ Okóm yó kem tau kendel gel mlóy ebè yó kem dwata kéng, tey dê gfà le bè klowil le. Là kóe mung bélê le ke sok le demsù, ne là kóe tmaba ebè yó kem kul dwata kéng yó.

⁵ Kaem tek són uu, Dwata, ken-gel nawahu. Gotu gel blayem dou yóm wen muhu du. Tódô hogotu kóm yóm klowilu elem haya.

⁶ Tey hyu yó kem deng basahem dou. Tey kegsengel nawahu du.

⁷ Tey kdóyónu ke Dwata abay se gel sen-galaken ou. Ke kifu, eles wen gel hefedemen dou anì elese temgama.

⁸ Eles gel hegnahu Dwata, ne tendo gel nô klohoku. Yó gónón là monol nawahu balù kihu sut béléu.

⁹ Duhen yó, tey keslamatu béléem, Dwata, ne tey kehyu nawahu. Tódô gnómu yóm kgel nawahu,

¹⁰ abay se tendo hensengem ebéléu yóm hatay. Lemwót bè yóm tendo gel kimónu kóm, là kô angat bayaem dou ebè yóm benwu yó kem tau deng matay.

¹¹ Tendo gel hegfanem béléu yóm lan ebè yóm klowil laen dù sónen. Angat tey kligalu bè yóm angat knóu dyó béléem, ne laen kô dù sónen yóm kbeyen nawahu béléem.