Kem Lingón 149 - Udél Dwata: Gna Kesfasad ne Lomi Kesfasad

¹ Hol dóyón tekuy Dwata. Semngal tekuy ebè Dwata yóm lomi sngal. Hol dóyón tekuy lem blóng yó kem tau deng stifun, yó kem tau là mili nawa le ebè Dwata.

² Ó kem tau Israél, hol hnigal ye yóm deng mifil kuy. Dalang se kuy, kem tau bè Jirusalim, hol hnigal ye yóm Hol Geta bélê ye.

³ Hol dóyón ye boluyen mlan bè kadal ye, hmung ye bè yóm tamburin gel nuni ye ne bè yó kem gel kenbit ye.

⁴ Abay se yóm Dwata, tey hligal bè yó kem tauhen. Wen ofol blayen yó kem tau hulung heglaan, duhen yóm kehewaen kul.

⁵ Hol le hligal yó kem tauhen bè yóm kadaten kul yó. Hol le hligal semngal igò le hlilil bè gónó le tungô.

⁶ Hol utóm le bè sumóng le yóm kdóyón le ke Dwata, igò le mkem yóm sudeng alì telem,

⁷ anì bneles le yó kem dumu benwu hmohon kul, ne tnafak le yó kem tau nô lemen.

⁸ Ne nfét le kedina yó kem tau hol geta bélê le, dalang se yó kem genlal bélê le,

⁹ anì tafak le kul yóm tafak deng mon Dwata bè sulaten. Ni se mò gónó le megdóyón yó kem tau là monol nawa le bè Dwata. Hol dóyón tekuy Dwata.