Kem Lingón 148 - Udél Dwata: Gna Kesfasad ne Lomi Kesfasad

¹ Hol dóyón tekuy Dwata. Yu kem nô bè yó kem longit seglafin, hol dóyón ye gu dyó Dwata.

² Ne yu kem gel hógówen gu bè longit, hol dóyón ye Dwata se kuy. Ne yu kem tey kdê sendaluen bè yó, hol dóyón ye Dwata se kuy.

³ Balù yóm kdaw ne bulón ne yó kem blotik gel kemnit bè longit, hol gel dóyón ye Dwata se kuy.

⁴ Bud yóm hol són longit tofi ta, ne yó kem tey él nô tahen, hol gel dóyón ye Dwata se kuy.

⁵ Yake tódô kdê le gotu dmóyón ke Dwata. Bè yóm tehe kedlimun Dwata kul, olo lemwót bè udélen.

⁶ Bud bè udélen snéen gónón tódô wen mdengen gónó le nô, ne là kô gbek le tô mulé du yóm udélen yó.

⁷ Hol dóyón ye Dwata se kuy, yu yem kdéen nô te tonok. Gomong yó kem blol lembang nô lem yóm tey mohin nelem, hol gel dóyón ye Dwata.

⁸ Senged se yóm ksilà ne bulók kulón ne kulón ne kem lobun, balù yóm tey lenos bong gel mimón du yóm dók Dwata, hol gel dóyón ye Dwata se kuy.

⁹ Bud dóyón ye se kuy kem bulul geta dalang se yó kem bulul lemnek. Senged se kuy yóm kdéen koyu mungu ne yó kem tey dlag lamang.

¹⁰ Ne kdéen ógóf mayal ne ógóf tnomò, kdéen kmadaw bè tonok ne kdéen onuk koyu, hol gel dóyón ye Dwata se kuy.

¹¹ Hol dóyón ye Dwata se kuy kdéen tau hol geta mogot benwu, ne yó kem tau knamal le, kdéen ngà tau hol geta ne yó kem dumu tau wen glal le,

¹² kem lomi libun, ne kem lomi logi, kem tuha, ne kem ngà, hol gel dóyón ye Dwata se kuy.

¹³ Yake tódô kdê le gotu dmóyón du yóm boluy Dwata, yóm Dwata gónó tekuy mogot. Laen kô dù dumu boluy geta sentahen. Yóm kegetahen, hol geta senta tonok, ne hol geta senta longit.

¹⁴ Tey mbegel kehdaen du yóm kbenwu yó kem kun tau Israél. Yó gónón mò du yóm yó anì kdê le gotu dmóyón du, yakà lu du se yó kem tau gónóhen nô nawahen. Hol gel dóyón tekuy Dwata.