Kem Lingón 147 - Udél Dwata: Gna Kesfasad ne Lomi Kesfasad

¹ Hol dóyón tekuy Dwata. Tey hyu gemnóm du ke sngal tekuy ebè kut Dwata yóm sngal dmóyón du. Tey minggel gemnóm du, ne tey knóón ke sendóyón tekuy Dwata.

² Bud hefdà Dwata Jirusalim, ne bud niten lu semfulék ebè benwu Israél yó kem tau deng tehe negef.

³ Henyuhen nawa yó kem tau deng lebà nawa le, bnausen yó kem halì le.

⁴ Deng eles hendemen ke hilu kwen yó kem blotik nmoen, ne yóm ket sotu bélê le, sal mdengen boluyen kul.

⁵ Tey kegetahen yóm Dwata tekuy. Ya tey kfasangen, laen dù gemsenged du. Yóm ketngónen yóm kdéen, là gbekem hmingón du.

⁶ Gel tnóbóng Dwata yó kem tau hulung heglaan, okóm fen ndaen lem tonok yó kem tau gel mò sidek.

⁷ Utómem bè sngalem yóm keslamatem bè Dwata. Sngalem yóm kdóyónem du, hmungem bè yó kem gel kenbitem.

⁸ Gbek hlobun Dwata bè klamangen longit, ne hkulónen etalak tonok. Htowoken yó kem bnes gu lem bulul lemnek.

⁹ Gel wen hkenen yó kem ógóf lem bnes, dalang se yó kem tnulón wak, gotu le mni béléen mò tnukô le.

¹⁰ Là beyen nawahen du kun yóm kudà alì kemgis, dalang se yóm kgis tau, le hilu he bè ktonen kul.

¹¹ Okóm tey hligal bè yó kem tau wen klikò le du, yó kem tau gentud nawa le yóm là konol yóm kbong nawahen kul.

¹² Hol dóyón ye Dwata, yu kem tau bè Jirusalim. Hol dóyón ye Dwata se kuy, yu kem tau bè Bulul Sayun.

¹³ Abay se deng gotu hbegelen yó kem bak tikeb benwu ye, ne tey któbóngen yó kem tau menwu lemen.

¹⁴ Deng heneken klamang benwu ye, ne deng hegsengelen nawa ye bè yóm kehyu yóm tbas ye.

¹⁵ Hwiten udélen talak tonok, ne tódô kendel gefet.

¹⁶ Hkulónen snu etalak tonok, deng hol lómón ke nes bukay ktonem du, ne lómón kohù ktonem du yóm amù deng baling ays etalak tonok.

¹⁷ Hebtangen bulók kulón etalak tonok, lómón ktudaen botu lemnek. Laen dù tau gembek hembala du yóm alì ksidek ketnawen.

¹⁸ Ominen bud mudél ebélê le, tódô gotu mnò se yóm kdéen. Ominen hemwit lenos, ne tódô baling él mlel se yóm ays.

¹⁹ Deng hetngónen ke Jakub yóm udélen, ne bè kem tau Israél gónón hetngón du yó kem hlauhen ne yó kem dumu hloloen kul.

²⁰ Laen dù dumu tau bè kem dumu benwu gónón mò du nim ni. Là kô tngón le du kul yó kem hlauhen. Hol dóyón tekuy Dwata.