Kem Lingón 146 - Udél Dwata: Gna Kesfasad ne Lomi Kesfasad

¹ Hol dóyón tekuy Dwata. Hotuhu nawahu se do dmóyón du.

² Klawihu mowil tendo dóyónu Dwata. Ne tendohe gel semngal ebéléen efet kukol towoku.

³ Hol béem ken-gel nawa yó kem tau mogot benwu. Laen dù bélê le ke gembek lemwà kóm.

⁴ Ke matay le, bud le baling kfung se kul, ne kdê yó kem tehe natul le, gotu gesón.

⁵ Hligal kun yóm tau ke tnóbóng Dwata yóm Dwata tehe Jakub. Hligal yóm tau ke genléd nawahen Dwata yóm Dwata gónóhen mogot.

⁶ Du se yóm Dwata tehe mò longit ne tonok ne mohin ne kdéen ton. Sal dnohoen yó kem deng fasaden.

⁷ Gel nfihen yó kem tau hen-gnok, ne gel benlayen ken yó kem bitil. Gel hefewaen yó kem tau blanggù,

⁸ ne htonen yó kem butô. Bud henwósen yóm blat nô ta yó kem tau meflayam. Tey kbong nawahen kul yó kem tau tedeng kmò le.

⁹ Bud nofinen lu snéen yó kem tólóng tau menwu lem blóng tekuy. Tendo tnóbóngen yó kem libun bolu ne yó kem ngà hikit. Okóm yó kem tau gel mò sidek, fen hensideken kógów klowil le.

¹⁰ Dwata se yóm hol dandónen geta, ne laen kô dù tul sónen yóm kegetahen. Yu kem tau menwu bè Sayun, yóm Dwata gónô ye kmulu, laen kô dù sónen yóm kogoten kuy. Hol dóyón tekuy Dwata.