Kem Lingón 145 - Udél Dwata: Gna Kesfasad ne Lomi Kesfasad

Lingón Dabid bè yóm kdóyónen ke Dwata

¹ Angat gel heglalagu yóm tey kegetahem, Dwata, yakà uu du yóm dou Dwata ne yóm dou gónó kmulu. Laen kô dù sónen yóm keslamatu béléem.

² Ket kdawu slamat béléem, Dwata. Laen kô dù sónen yóm kdóyónu kóm.

³ Tey kegetahen yóm Dwata. Du se yóm knóón hol sendóyón. Yóm kegetahen, là gbek tau hmingón du.

⁴ Yóm deng gel nmoem lem blóng me, Dwata, ket lugod yó kem sfu me, angat bud gel sendóyón le uu se kul. Angat gotu sensból le yóm tey nmoem lem blóng me.

⁵ Angat sentulón le yóm tey klinggelem ne yóm tey kegetahem. Ne sónmou gel hemdem du se dou yóm tey tennga deng nmoem bélê me.

⁶ Angat gel sentulón yó kem tau yóm tey kegbekem, ne angat gel hbólu yóm tey kegetahem.

⁷ Gotu sensból le yóm kehyu nawam, ne utóm le sngal yóm tey ktedeng kmoem.

⁸ Yóm Dwata gónó tekuy mogot, tey kbong nawahen tau, ne tey knoduhen lu. Là kóen mahil lembut, ne là kóen monol yóm kbong nawahen tau.

⁹ Tey hyu kmò Dwata ebè yóm kdéen tau, ne tey kkoduhen kul yóm kdê deng nmoen.

¹⁰ Kdê yó kem deng tehe dlimunem, Dwata, angat gotu semdóyón kóm. Ne kdê yó kem kóm tau, angat le gotu slamat béléem.

¹¹ Angat gotu sentulón le yóm tey kehyuhen yóm kogotem tau, ne yóm tey kegbekem,

¹² anì kdéen tau gotu temngón du yóm tendo gel nmoem, ne yóm tey klinggelen yóm kóm kogot.

¹³ Laen kô dù tul sónen yóm kkamalem, ne laen kô dù tul sónen snéen yóm kegetahem. Là kô klifót Dwata du yóm kdê tehe fasaden tekuy. Gotu gfan bè kdê yó kem gel nmoen yóm kkoduhen tau.

¹⁴ Gotu tnóbóngen yó kem tau wen gfà le. Gotu bud hdaen yó kem tau deng btang.

¹⁵ Kdéen mowil, gotu le lengalà ebéléem, Dwata, ne ke bitil le, sal gel wen ken blayem kul.

¹⁶ Tey wen gel blayem kul, ne tódô gotu gsengel nawa le du yóm kdê le.

¹⁷ Tey tedeng yóm Dwata bè kdê gel nmoen. Tódô gotu gfan bè yóm nmoen yó yóm kkoduhen tau.

¹⁸ Tey moni bè yó kem tau gel tmaba ebéléen, bè yó kem tau hol lemwót bè nawa le tmaba du.

¹⁹ Gel blayen bè yó kem tau wen klikò le du yóm wen mu le du. Hnungolen yóm alì kni le béléen, ne lenwaen lu.

²⁰ Nofinen yó kem tau kembong nawa du, okóm fen genlaen yó kem tau gel mò sidek.

²¹ Senflósu dou gel dmóyón ke Dwata. Yó kem kdê deng dlimunen, yake bê le abay nmò sónen yóm kdóyón le du yóm kun boluy.