Kem Lingón 144 - Udél Dwata: Gna Kesfasad ne Lomi Kesfasad

Lingón Dabid

¹ Tey kdóyónu ke Dwata, lómón ke du yóm botu bong gónów gel heklung. Toloken o mit sgida, ne wen kenhulung mit sfatay blayen do.

² Du se yóm Dwata kembong nawa do ne gónów gel hofin. Bud du se yóm mbegel, mò do gónó e hles, ne du se gel lemwà do. Eles mdà bè soluhu mò klungu, ne ebéléen gónóhu e mlo. Hogoten dou yó kem dumu benwu.

³ Ó Dwata, olo me tau matay se kum, ewenem sana ketngónem kum. Olo me tau tonok, ewenem sana kehedemem kum.

⁴ Là kóen té klowil me, hol lómón ke olo nawa, duhen ke olo olung kendel lana.

⁵ Hennasem longit, Dwata, ne mnauli elaan, tendólem yó kem bulul anì semfut kebel le.

⁶ Hol heksilaem anì gotu le sekla yó kem hohonem. Gentiem lu anì gotu le sekla mlóy.

⁷ Hloyolem elaan sigelem ne lenwaem o. Lenwaem o gu lem yóm él nelem, gu lem hólól yó kem tólóng tau.

⁸ Hono kéng btang bè sumóng le. Igò le se smafà anì tulón le yóm ktahuhen, okóm kéng le.

⁹ Wen lomi lingón nmou béléem, Dwata, lingónu yóm kdóyónu kóm, hmungu bè yóm gel kenbitu sfolò féten.

¹⁰ Abay se gbekem hegmò yó kem tau hol geta. Uu se yóm deng lemwà ke Dabid yóm tau tóbóng lówóhem.

¹¹ Hol kenlungem o bè bak suk. Lenwaem o lem hólól yó kem hohonu. Hono kéng btang bè sumung le. Igò le se smafà ani tulón le yóm ktahuhen, okóm kéng le.

¹² Yó kem ngà me logi lomi lemnok, hol tilob kenok le he lómón yóm hulu tilob kebud le du. Yó kem ngà me libun lomi lemnok, hol le knóón libun he lómón yóm hehek knóón bè gónô bong.

¹³ Kólen bè yó kem tebungus me, hol le hnok he. Dalang se yó kem ubiha me bè yóm gónó le mótób, hol le mból he nsóhem bè libuhen, baluen ke nsóhem bè sfolò libuhen.

¹⁴ Ne yó kem safì me demyol klitun, hol tódô hungu he lulón le. Laen dù hohon he ke gembek husek elem benwu me, ne laen se dù tau negef bélê me, ne laen se dù gungolem lemangat bè kem lan me.

¹⁵ Tey kehligal le yó kem tau ke lómón ni klowil le. Tey kehligal le kul yó kem tau ke yóm Dwata hol gónó mogot yóm kul Dwata.