Kem Lingón 143 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hol hnungolem yóm knihu béléem, hnungolem yóm kehkoduhu béléem. Hol bnalaem o, abay se là kóen monol nawahem ebéléu, ne tey tedeng yóm kóm kmò.

² Hol béem tagad knukum ou yóm tau tóbóng lówóhem, abay se laen kô dù tau mowil talak tonok ke tedeng ktonem du.

³ Deng ktesen o hohonu. Deng tódô hlasaen o bè tonok. Deng tódô lohen ou elem gónón kmifu, hol lómón kmou yóm tau matay deng lebeng.

⁴ Laen dù bud lanu ne. Alì sidek klikou, laen dù gmou.

⁵ Gtulón nawahu yóm kdaw gnan ekni. Sónmou hemdem du yó kem tehe gel nmoem, Ne bud hendemu snéen yó kem tey gendengem.

⁶ Hdau eta sigelu bè yóm knihu ebéléem. Tey sidek khahuu kóm, mkéle bè yóm tonok mékéng hendeenen héfê bè kulón.

⁷ Géhél bnalaem ou, Dwata, abay se laen dù bud lanu ne. Béem knogol o, kô mataye.

⁸ Hol hfungolem do hlafus yóm là konolen yóm kbong nawam do, yakà són uu genléd nawaw. Tolokem do yóm nóyô hlanem do, yakà són uu du gónóhu mni.

⁹ Lenwaem o, Dwata, bè yó kem hohonu. Mlóye ebéléem anì bnosem o.

¹⁰ Tolokem o mò du yóm kóm kóyô, yakà uu du yóm do Dwata. Yó hem Tulusem he fen malak do anì laen dù gfau.

¹¹ Lenwaem ou, Dwata, mò gónón megdóyón boluyem. Bè yóm tey ktedengem, yó gónóhu gewà bè nim gónóhu glayam.

¹² Lemwót bè yóm là konol yóm kbong nawam do, sulék hnatayem kdê yó kem hohonu, yakà ou du yóm tau tóbóng lówóhem.