Kem Lingón 142 - Udél Dwata: Gna Kesfasad ne Lomi Kesfasad

Lingón Dabid bè yóm tehe knóen lem kilib

¹ Tey kehtóbóngu bè Dwata, tey kehkoduhu béléen.

² Gotu tulónu du yóm dê tnalawu bè klowilu, ne yó kem alì blat nô tahu, gotu tulónu du.

³ Bè yóm gónóhu là bud gbala, tódô tngón Dwata yóm lan mò lolou. Bè ket tô lanu, wen sù le du yó kem hohonu mò tô alu le dou.

⁴ Ke temngele gu hilolu, laen kô dù tonu tau ke tmóbóng do. Balù sotu ke wen hemdem do. Laen dù tau tmóbóng dou. Laen dù tau hemdem du ke wen gel glumfaku.

⁵ Ominu htóbóng béléem, Dwata. Monu mò kóm, “Tek són uu mò gónóhu heklung. Sónen uu yóm hol bong muhen bè klowilu.

⁶ Hol hnungolem yóm tey kehkoduhu béléem, yakem wen se bud nefet nawahu. Hol lenwaem o lem tdok yó kem hohonu, yakà tey le alì kemgis sentahu.

⁷ Hol kóhem tahu yóm alì hemblat do. Ke yó se nmoem béléu, nénégem angat tey kdóyónu kóm. Angat le gotu stifun béléu yó kem tau tedeng kmò le lemwót bè yóm tey kehyu nmoem béléu.”