Kem Lingón 141 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, tmabahe ebéléem. Géhéli dou. Hol hnungolem yóm kehtóbóngu béléem.

² Henmóyóem yóm knihu, mò henged boo tilob ntemu ebéléem. Ne yóm kehdau sigelu eta, mò henged dsuu ebéléem ke kimel.

³ Hol bnenteyem kmò kudélu, Dwata, ne nafasem do ksumóngu.

⁴ Hol kóhem yóm óyóu mò sidek, béem hlus o mung bè yó kem tau gel mò sidek, ne béem hlus o mung mken bélê le.

⁵ Mom hyu he ke yó dmofì do yóm tau tedeng kmoen. Wen gónón hyu béléu se yó. Ke wen bnólów le béléu, hol lómón ke henged bulung bè lówóhu. Hol tnóbóngem o anì là gekbéu du. Okóm sónmou gel mni du bè Dwata anì hensengen yóm sidek gel nmò le, ne anì hensengen se yó kem tau mò du.

⁶ Ke deng bot le elem kbu yó kem tau malak kul, yó he khungol le do yó kem tau gel mung kul, ne hentahu le yóm monu.

⁷ Lómón yóm tau dmadu, gotu gomong senwóten yó kem botu, ne gotu bulét, lómón se yó kbulét tiol yó kem tau gel mò sidek, laen dù mdengen lembeng kul.

⁸ Htóbónge béléem, Dwata yóm Dwata hol dandónen geta. Uu se yóm dou gónó e mlo. Hol nofinem ou anì là ghatay le do.

⁹ Hensengem béléu yó kem gónó le hebkó do yó kem tau gel mò sidek, dalang se yó kem gel holot le do.

¹⁰ Bud lu he tles bkó du yó kem holot le yó, okóm fen hefewaem ou do.