Kem Lingón 140 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hol lenwaem o bè yó kem tau gel mò sidek. Nofinem o bè yó kem tau alì lóbô,

² yó kem tau sónmò le matul mò sidek lem hendem le, ne lenulus le kdaw tendo mò sidek.

³ Tey des yóm udél gel btang bè sumóng le, hol lómón ékét ulal, ne tey des kudél le, hol lómón alas sedof.

⁴ Ó Dwata, tnóbóngem o anì là nóe lem hólól yó kem tau gel mò sidek. Kenlungem o bè yó kem tau alì lobô, yakà nifis le o.

⁵ Yó kem tau heklabak, wen holot nmò le mò alu le do. Deng nból le huket le, ne deng tey wen holot nmò le bè lan.

⁶ Yó monu mò ke Dwata, “Uu se yóm dou Dwata.” Hol hnungolem, Dwata, yóm kehkoduhu béléem.

⁷ Ó Dwata yóm hol dandónen geta, yóm alì kemgis lemwà do, deng gel kenlungem o bè yóm kdawen wen gida.

⁸ Hol béem bayà ou bè yó kem tau gel wen óyô le mò sidek. Hensengem, Dwata, anì là gfuhen yó kem sidek atul le.

⁹ Hol tles heglaem yó kem hohonu bè yóm sidek deng atul le etahu.

¹⁰ Hol hebtangem eta kulu le yo kem bala ofi kemyóngón, duhen ke tódô tudaem lu elem ofi, duhen ke elem sol leyong ani là bud le gewà.

¹¹ Hol béem abay hdengen lu yó kem tau mò kéng bè nim benwu me. Hol wen he hlayam hgefetem bélê le yó kem tau alì lóbô.

¹² Okóm tngónu angat dohò tnóbóng Dwata yó kem tau alì hensidek le, angat nfihen yó kem tau élél.

¹³ Hol tahu dóyón le boluyem yó kem tau tedeng kmò le, abay se béléem gónó le nô.