Kem Lingón 14 - Udél Dwata: Gna Kesfasad ne Lomi Kesfasad

Lingón Dabid yóm ksidek nmò yó kem tau

¹ Bè kul kehedem yó kem tau là hulungen hedem, gel henkéng le ke wen Dwata. Yó kem tau yó, hono sidek kehedem le, ne hono sidek yóm gel nmò le. Balù sotu bélê le ke mò du yóm tedeng.

² Ne yó nmò Dwata, gel temngel elaan ebè yó kem tau te tonok, nénégen ke wen tau tonen hol hulung hedem, ne ke hol móyô tmaba ebéléen.

³ Okóm deng le mom gotu hetlas, hono sidek nmò le. Laen kô dù tonen bélê le ke tedeng nmoen, balù sotu.

⁴ Ofo kul mon du ke là gel ton Dwata du yóm sidek gel nmò le. Yó udél Dwata, monen, “Laen kô dù bélê le ke hulung hedem. Tódô le mowil lan le lemugi yó kem dou tau. Hol mou kun ne ke tô le gel mni ebéléu yó kem tau gel mò sidek yó.”

⁵ Okóm yó kem tau yó, angat wen kdawen sut bélê le yóm alì sidek klikò le, abay se yóm Dwata, sónmoen gel nô bè yó kem tau mimón du.

⁶ Yó kem tau sidek gel nmò le yó, sónmò le gel hemseng atul yóm tau hulung heglaan, okóm tey gel kofin Dwata du.

⁷ Tey gel knihu bè Dwata anì géhél hegmoen tekuy kem kun tau Israél. Lemwót gu bè kun Bulul Sayun yóm któbóngen tekuy yó. Angat tey kligal tekuy sok bud hen-gulék Dwata yóm klowil tekuy.