Kem Lingón 139 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, deng gotu henklolem ne yóm dou kmò, laen kô dù là tngónem du béléu.

² Deng gotu tngónem yóm kdê nmou, ne yó kem angat hendemu, deng eles tngónem.

³ Tendo tonem o. Baluen ke moe nmò duhen ke hegnóe, gotu tngónem yóm kmò kekdolu.

⁴ Balù yóm gu laanu là deng mudél, eles tngónem yóm angat monu.

⁵ Tendo gel lenibutem o. Tendo gel nofinem o mlan bè kfasangem.

⁶ Tey ketngahu du yóm ketngónem do, là kô gbeku hmingón du.

⁷ Là kô gbeku hembnos du yóm Tulusem ne là se gbeku hemlóy kóm.

⁸ Ke mógówe ebè longit, elesi sem nô bè yó. Ke mógówe ebè benwu yó kem tau matay, bud bè yó gónóm nô.

⁹ Ke yó dum gbeku móyóng esentu dmata kdaw, duhen ke nóe bè yóm benwu nô esentu desdef,

¹⁰ kaem elesi nô bè yó mò malak do ne mò tmóbóng do.

¹¹ Anien ke gbeku mudél ebè yóm kifu anì bnosen o, duhen ke gbeku mudél ebè yóm layag anì tódô baling kifu,

¹² okóm béléem kóm, Dwata, baluen ke kifu là kô gbeku hembnos kóm. Yóm kifu, lómón ktataw layagen kemdaw yóm béléem. Tódô senged ktonem du kóm yóm layag ne yóm kifu.

¹³ Yóm kdê nô bè lówóhu ni, deng gotu nmoem béléu yóm tolo knóu lem blutut yê.

¹⁴ Tey kdóyónu kóm, Dwata, tey minggel yóm kdê nô bè lówóhu. Tey bong hentaw yóm kdê deng nmoem béléu. Deng hol tngónu se dou yóm ni.

¹⁵ Bè yóm tehe kenoku lem blutut yê bè gónón kmifu tek sotuhu deng sana tonem ou.

¹⁶ Deng eles tonem ou ne gu laanu là deng sut. Ne gu laanu là deng sut he, deng eles snulatem bè bokem yó kem deng oluhem etahu lemwót bè yóm kdaw ksutu efet kól bè yóm buteng angat katayu.

¹⁷ Ó Dwata, tey bong muhen béléu yóm kdê kehedemem, là kô gbeku msó kul.

¹⁸ Lómón kwen le helek. Ke btike hlafus, sana tódô knóem béléu.

¹⁹ Ó Dwata, hendéméu dé ke gotu hnatayem lu yó kem tau mò sidek. Hendéméu ke tódô bayà le o yó kem tau mit klóbô.

²⁰ Sidek udél le gbak ebéléem. Sidek kebkó le ebè boluyem.

²¹ Tey sidek kutó nawahu kul, Dwata, yó kem tau kmutó nawa kóm. Tey sidek kekbéu kul yó kem tau gel mulé kóm.

²² Alì sidek kutó nawahu kul, gotu hohonu lu yó kem tau yó.

²³ Hol henklolem o, Dwata, hol tenngelem yóm nô lem nawahu. Hol tilówem o anì tngónem yóm nô lem hendemu.

²⁴ Nénégem ke wen sidek tonem béléu, ne hol sen-galakem o lemolò du yóm lan hlós ebè yóm klowil laen dù tul sónen.