Kem Lingón 138 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, hotuhu nawahu slamat béléem. Lingónu yó kem lingón dmóyón kóm bè solu yó kem dwata kéng.

² Mtude bukol yóm igou smolu ebè yóm kóm Gónô, tmabahe béléem, ne dóyónu yóm kóm boluy lemwót bè yóm là konol nawahem ebéléu ne bè yóm ktenebem béléu. Abay se deng hegetahem bè kdéen yóm kóm boluy ne yóm kóm udél.

³ Bè yóm gel knihu béléem, gel bnalaem o. Sal gel ten-gelem nawahu mlan bè kehekgisem dou.

⁴ Kdê yó kem tau hol geta bè klamang benwu, angat tey kdóyón le kóm, Dwata, abay se kdê le angat mungol du yóm kóm udél.

⁵ Tahu se, angat utóm le bè sngal le yóm kun kmò Dwata, abay se tey kegetahen yóm kun keklóón Dwata.

⁶ Balù yóm tey kegetahen yóm Dwata, ewenem sal gel sen-gifaen yó kem tau hulung heglaan, okóm hlayuk bè yó kem tau heklabak.

⁷ Anien ke wen tey hlayamu, là kô tódô bayaem do bè lebut yó kem hohonu. Tnafakem lu yó kem hohonu alì lembut. Yóm kóm kegbek angat lemwà do.

⁸ Angat hendohò Dwata yóm atulen bè klowilu. Yóm kbong nawahem là monolen, Dwata, laen kô dù tul sónen. Béem tódô baya o, abay se uu yóm mò dou.