Kem Lingón 137 - Udél Dwata: Gna Kesfasad ne Lomi Kesfasad

¹ Myón me bè kilil yó kem él bè Babilun. Tey kkik me bè yó, gtulón bè nawa me Sayun yóm kum benwu.

² Sdang me yó kem kenbit me bè yó kem hanga koyu moni bè yó, là bud me móyô kembit kul.

³ Dók le mi semngal yó kem tau megef kum, kóyô le ke hnigal me lu. Yó mon le mò kum, “Sngal ye kum yóm tehe gel sngal ye bè Sayun.”

⁴ Là kô gbek me semngal du bè tólóng benwu yóm sngal Dwata.

⁵ Ke klifótu yóm dou benwu Jirusalim, hol kóhem béléu, Dwata, yóm khulungu kembit.

⁶ Ke klifótu Jirusalim, ne ke là lemwóten béléen yóm kligalu, hol kóhem béléu, Dwata, yóm khulungu semngal.

⁷ Ó Dwata, bè yóm kdaw tehe kegbà kem tau Babilun du yóm Jirusalim, hol béem klifót yóm tehe kul nmò yó kem tau Idom. Béem klifót yóm tehe gel kmon le du, “Hol genbà ye dé, béen wen tebel du.”

⁸ Ne bud uu se, benwu Babilun, angat wen he tau gembà kóm se kóm. Hligal yóm tau bud mò du bélê ye yóm tehe nmò ye bélê me.

⁹ Angat bud nwahen se yó kem kuy ngà lemnek, gotu tefesen lu bè botu, lómón yóm kuy tehe nmò bélê me.