Kem Lingón 135 - Udél Dwata: Gna Kesfasad ne Lomi Kesfasad

¹ Hol dóyón tekuy Dwata. Hol dóyón tekuy yóm kun boluy Dwata. Hol dóyón ye se kuy, yu kem tau tóbóng lówó Dwata,

² yu kem tau mò nmò bè gónô Dwata, dalang se yó kem mò nmò bè lósól yóm gónô yóm Dwata tekuy.

³ Hol dóyón tekuy Dwata, abay se tey hyu yóm Dwata tekuy. Hligal sngal tekuy yóm tey klinggel boluyen.

⁴ Abay se deng nélék Dwata Jakub mò kun, nfunen yó kem tau Israél mò hol gónón nô nawahen.

⁵ Tngónu yóm tey kegeta Dwata yóm Dwata tekuy hol geta, senta yó kem dwata kéng.

⁶ Gotu nmò Dwata balù kihu nóyô nmoen ditu bè klamangen longit, ne dini te tonok ne lem mohin kkólen bè yóm hol gónón nelem.

⁷ Gbeken hlobun gu te tonok, ne heksilaen mung bè kulón. Gbeken hbel lenos gu bè yóm deng gónóhen e semtifun du.

⁸ Ditu bè Idyip, gotu hnatayen yó kem ngà logi twogu bè ket gónô yó kem tau Idyip, homong hnatayen se yó kem ngà yó kem ógóf le tanay sut.

⁹ Tey dê hentaw ton nmoen bè Idyip mò tmafak ke Faro yóm tau hol geta ne yó kem genlalen.

¹⁰ Tey dê tau bè yó kem benwu lembang genbà Dwata, ne gotu hnatayen yó kem tau hol geta alì mfasang.

¹¹ Hnatayen Sihon yóm tau hol geta bè yó kem tau Amurayt, ne Og yóm tau hol geta bè yó kem tau bè Basan, kkólen bè yó kem tau hol geta bè Kanan, gotu hnatayen lu.

¹² Lemwót yóm tonok le, gotu blayen bè yó kem tauhen Israél mò hol kul nfun.

¹³ Yóm kóm boluy, Dwata, laen dù tul sónen. Tódô ket lugod tau gotu temngón du yóm któtólem.

¹⁴ Abay se angat nfi Dwata yó kem kun tau, ne tey kkoduhen kul, yakà lu du yó kem tóbóng lówóhen.

¹⁵ Yó kem kul dwata lennged yó kem tau bè tólóng benwu, gel nmò le bè blówón bukay ne tahu blówón, hono nmò tdok tau.

¹⁶ Wen sumóng le, okóm là kô le mudél. Wen mata le, okóm là kô le mton.

¹⁷ Wen klingu le, okóm là kô le mungol. Wen ilung le, okóm là kô le gmungef.

¹⁸ Yó kem tau mò kul yó, ne yó kem tau smalig bélê le, hol le mkél bè yó kem dwata nmò le.

¹⁹ Ó kem tau Israél, hol dóyón tekuy Dwata. Ó kem sfu Aron kem tau gel blóng ebè Dwata, hol dóyón ye Dwata se kuy.

²⁰ Dalang se kuy, kem sfu Libay, hol dóyón ye Dwata. Kdê ye kem tau wen klikò ye ke Dwata, hol dóyón ye Dwata.

²¹ Hol dóyón tekuy Dwata gu bè Sayun, yakà bè ni du bè Jirusalim gónóhen nô. Hol dóyón tekuy Dwata.