Kem Lingón 132 - Udél Dwata: Gna Kesfasad ne Lomi Kesfasad

Sngal bè yóm kneged le ebè Jirusalim

¹ Ó Dwata, hol hentulónem nawa Dabid ne kdê yó kem mgel deng henbalahen.

² Hentulónem nawa yóm deng safaen béléem, yóm safaen bè yóm Dwata alì gembek yó kem tau Israél, yóm monen,

³ “Là kóe mulék ebè dou gónô, ne là se kóe hegnô.

⁴ Là se kóe tagad tungô, là se kóe hgulof,

⁵ ke là naw ton du yóm gónów hdà du yóm gónô mò ke Dwata, yóm gónô mò gónón nô yóm Dwata alì gembek yó kem tau Israél.”

⁶ Deng gungol me nô bè benwu Ifrata yóm Slungan Fasad, ne ditu bè tonok Jaar gónó me mton du.

⁷ Lemwót tekuy ne, mógów tekuy ebè yóm gónó Dwata nô. Tmaba tekuy ebéléen bè yó.

⁸ Ó Dwata, huseki kum elem yóm kóm gónô, mung kóm yóm Slungan Fasadem, yóm Slungan ilô yóm kóm kfasang.

⁹ Yó kem tau gel blóng ebéléem, lu se fen mit yóm kóm kegewà ebè yó kem tau. Ne yó kem tauhem, hol le hligal semngal ebéléem.

¹⁰ Lemwót bè yóm nawahem bè Dabid, yóm tau tóbóng lówóhem, béem knogol nawa yóm tau hol geta deng nélékem mò malak yó kem tauhem.

¹¹ Tey mget yóm tehe fasad Dwata ke Dabid, là kóen na a bud mulék elem baken, monen, “Angat wen bè yó kem sfuhem tles myón bè yóm gónóm myón kmamal.

¹² Ke là nulé le du yóm deng senfasad me, ne ke lolò le yó kem hlolou kul, angat laen dù tul sónen yóm kesetles le myón bè yóm kóm gónó myón kmamal.”

¹³ Yakà deng nélék Dwata yóm benwu Jirusalim, kóyóen ke bè yó gónóhen nô.

¹⁴ Yó monen, “Ni se yóm benwu mò gónóhu nô kól bè laen dù sónen. Bè ni gónów nô, abay se ni se yóm benwu hol dou nóyô.

¹⁵ Angat henyuhu klowil yó kem tau lemen, ne hegsengelu nawa yó kem tau élél nô du là bud le bitil.

¹⁶ Ne yó kem tau gel blóng ebéléu, nmou lu mò fen mit yóm kegewà ebè yó kem tau. Ne yó kem tau tendo mimón do bè yó, angat le hligal semngal ebéléu.

¹⁷ Bè ni bè Jirusalim angat wen sotu semfu bè Dabid néléku mò tau hol geta alì mfasang. Yóm tau néléku yó mò layag ebè yó kem tauhu.

¹⁸ Angat sidek kehyaku yó kem hohonen, bede yóm kun, angat tey minggel yóm kegetahen.”