Kem Lingón 130 - Udél Dwata: Gna Kesfasad ne Lomi Kesfasad

Sngal bè kneged le ebè Jirusalim

¹ Ó Dwata, lemwót bè yóm alì ksidek kebà nawahu, yó gónóhu tmaba ebéléem.

² Hol hnungolem o, Dwata, hnungolem yóm knihu tóbóng béléem.

³ Ke nawam smolò du yó kem salà nmò me, balù sotu bélê me ke gewà gu lem tafakem.

⁴ Okóm deng tódô hnifótem mi, anì yó, wen klikò me mulé kóm.

⁵ Tey kangatu du yóm któbóng Dwata do, ne tey kegléd nawahu du yóm udélen ebéléu.

⁶ Yóm kangatu ke Dwata, hol lómón yó kem tau mentey kifu, nangat le géhél kwasen. Mkay bè yó he, Dwata, yóm kangatu du yóm géhél któbóngem do.

⁷ Ó kem tau Israél, hol ye smalig bè Dwata, abay se là kóen monol yóm kbong nawahen tekuy. Hol nô bè nawahen yóm któbóngen tekuy.

⁸ Angat gotu hewaen lu lem yóm kdê salà le yó kem kun tau Israél.